బికినీలో మార్షల్‌ ఆర్ట్స్‌: ఆర్జీవీకే చెల్లింది.!

రామ్‌ గోపాల్‌ వర్మ ఏం చేసినా సంచలనమే.. ఆ సంచనాలు ఎన్నిసార్లు బెడిసికొట్టినా సంచలన దర్శకుడన్న ట్యాగ్‌లైన్‌ మాత్రం ఆయనకి అలాగే అతుక్కుపోయింది. కంటెంట్‌ లేని సినిమాల్ని వరుసగా తీస్తూ కూడా రామ్‌ గోపాల్‌ వర్మ తన తదుపరి సినిమాలపై అంచనాలు పెంచగలుగుతున్నాడు. అదీ ఆయన ప్రత్యేకత.

తాజాగా ‘అమ్మ రాజ్యంలో కడప బిడ్డలు’ బాక్సాఫీస్‌ వద్ద దారుణంగా బెడిసికొట్టింది. ఆ పెయిన్‌ని మరిపించేలా తన అభిమానులకు రామ్‌ గోపాల్‌ వర్మ ఓ బహుమతిని ‘ఎంటర్‌ ది గర్ల్‌ డ్రాగన్‌’ రూపంలో అందించాడు. బికినీ ధరించి ఓ బ్యూటీ మార్షల్‌ ఆర్ట్స్‌ చేస్తోంటే.. ఆహాహా ఆ ఆలోచన రామ్‌ గోపాల్‌ వర్మకి కాక ఇంకెవరికి వస్తుంది.?

అయితే, ఇక్కడ బికినీ అందాల్ని కాదు చూడాల్సిందే.. ఆ కాస్ట్యూమ్స్‌ ధరించిన పూజా భలేకర్‌ చేసిన కళ్ళు చెదిరే స్టంట్స్‌ని. మరో సన్నివేశంలో పూజా భలేకర్‌ షార్ట్‌ డ్రస్‌ ధరించి.. బ్రూస్‌లీ విగ్రహం వద్దకు వెళుతుంటుంది. కెమెరా ఎక్కడి పెడితే ‘కిక్‌’ వస్తుందో.. వర్మ అక్కడే పెట్టాడు. బ్యాక్‌గ్రౌండ్‌ స్కోర్‌ చించేశారు. సినిమాటోగ్రఫీ అదిరిపోయింది. ఒక్క మాటలో చెప్పాలంటే ‘ఎంటర్‌ ది గర్ల్‌ డ్రాగన్‌’ ట్రైలర్‌ ఓ అద్భుతం. అంత గొప్పగా దీన్ని మలిచారు.

చీర కట్టుకుని ఓ సన్నివేశంలో పూజా భలేకర్‌ చేసిన ఫైట్‌ గురించి ఎంత చెప్పుకున్నా తక్కువే. ఆగండాగండీ.. సినిమా ఇంతకు మించి అద్భుతంగా వుంటుందని ఆశించేయొద్దు. ఎందుకంటే, వర్మ ఈ మధ్య ప్రోమోస్‌ మీద పెట్టి శ్రద్ధ సినిమా మీద పెట్టడంలేదు. సో, ‘ఎంటర్‌ ది గర్ల్‌ డ్రాగన్‌’ ప్రస్తుతానికి ట్రైలర్‌ వరకు మాత్రమే అద్భుతం. సినిమా ఎలా వుంటుందో తెలియాలంటే ఇంకొన్నాళ్ళు ఆగాల్సిందే.

ఒక్కటి మాత్రం నిజం.. ఆర్జీవీ మళ్ళీ మ్యాజిక్‌ చేస్తాడేమో.. అని కాసిని ఆశల్ని ఆయన అభిమానులకు ఈ ట్రైలర్‌ కల్పించింది.