అమితాబ్‌ – చిరంజీవి.. స్నేహమంటే ఇదేరా.!

బిగ్‌-బి అమితాబ్‌ బచ్చన్‌, ‘సైరా నరసింహారెడ్డి’ సినిమాలో ఓ కీలక పాత్ర పోషించడం వెనుక మరీ పెద్ద కథ ఏమీ నడవలేదని చిరంజీవి పదే పదే చెబుతున్న విషయం విదితమే. దర్శకుడు సురేందర్‌ రెడ్డి, ఆ పాత్ర కోసం అమితాబ్‌ గురించి ప్రస్తావించడం, ఆ వెంటనే తాను అమితాబ్‌ని అడిగితే.. అడిగిన మరు క్షణమే తనకు అట్నుంచి ‘సరే’ అన్న సమాధానం వచ్చిందనీ చిరంజీవి మరోసారి గుర్తు చేసుకున్నారు ‘సైరా నరసింహారెడ్డి’ సక్సెస్‌ మీట్‌లో.

మరోపక్క, ‘సైరా నరసింహారెడ్డి’లో గోసాయి వెంకన్న పాత్ర కోసం అమితాబ్‌ బచ్చన్‌, భారీ రెమ్యునరేషన్‌ తీసుకున్నారన్న ప్రచారం జరుగుతున్న విషయం విదితమే. దాని గురించి చిరంజీవి మాట్లాడలేదుగానీ, ‘సినిమా కోసం ఒప్పుకున్న తర్వాత అమితాబ్‌ బచ్చన్‌, తన సొంత ఖర్చులతో.. సొంత టీమ్‌తో షూటింగ్‌కి వచ్చేవారు.. తన షూట్‌ పార్ట్‌ పూర్తయ్యేవరకు మా నుంచి ఎలాంటి ప్రత్యేక ఆతిథ్యం ఆయన ఆశించలేదు. మేం, ఎంత ప్రయత్నించినా, అమితాబ్‌ ఒప్పుకోలేదు. ఆయనకు నేను రుణపడిపోయాను. ఖచ్చితంగా రుణం తీర్చుకునే ఆలోచన మాత్రం చేస్తాం..’ అని చిరంజీవి, అమితాబ్‌ బచ్చన్‌ ‘సైరా నరసింహారెడ్డి’ కోసం చేసిన సాయం గురించి చెఫ్పుకున్నారు.

నిజానికి, అమితాబ్‌ బచ్చన్‌ రెమ్యునరేషన్‌ విషయంలో పక్కాగా వుంటారు. అదే సమయంలో, ఆయన కమిట్‌మెంట్‌ చాలా చాలా గొప్పది. ‘ఆయన రుణం తీర్చుకోలేం..’ అని సాక్షాత్తూ మెగాస్టార్‌ చిరంజీవి చెప్పారంటే, ఇద్దరి మద్యా స్నేహానుబంధం ఎంత గొప్పదో అర్థం చేసుకోవచ్చు.

మరోపక్క, బాలీవుడ్‌లో ‘సైరా నరసింహారెడ్డి’ని చెయ్యాల్సిన రీతిలో ప్రమోట్‌ చేయలేదన్న విమర్శలు లేకపోలేదు. ‘ఆ వయసులో మరీ అమితాబ్‌ని అంతగా ఇబ్బంది పెట్టలేం. అక్కడికీ ఆయన ఓ ఇంటర్వ్యూ ఇచ్చారు.. అదే చాలా గొప్ప విషయం’ అని ‘సైరా నరసింహారెడ్డి’ యూనిట్‌ వర్గాలు అంటున్నాయి.