రాజకీయాల్లోకి ‘మెగా’ రీ-ఎంట్రీ.. ఏది నిజం.!

మెగాస్టార్‌ చిరంజీవి రాజకీయాల్లోకి రీ-ఎంట్రీ ఇవ్వబోతున్నారట. ఆయనకు త్వరలో రాజ్యసభ సభ్యత్వం దక్కబోతోందట. ఈ మేరకు వైఎస్సార్‌ కాంగ్రెస్‌ పార్టీతో చిరంజీవి ఒప్పందం కుదుర్చుకున్నారట. 2020లో చిరంజీవిని మళ్ళీ రాజకీయాల్లో యాక్టివ్‌గా చూసే అవకాశం వుందట. తమ్ముడు పవన్‌ కళ్యాణ్‌ స్థాపించిన జనసేన పార్టీని భూ స్థాపితం చేయడానికే చిరంజీవి నిశ్చయించుకున్నారట. ఈ క్రమంలో ఆయన వైఎస్‌ జగన్‌తో చేతులు కలుపుతున్నారట. చిరంజీవి రాకతో, తెలుగుదేశం పార్టీ పూర్తిగా కాలగర్భంలో కలిసిపోనుండడం ఖాయమట.

ఇలా సవాలక్ష ఊహాగానాలు రాజకీయ వర్గాల్లో విన్పిస్తున్నాయి. మాజీ కేంద్ర మంత్రి, మాజీ రాజ్యసభ సభ్యుడు చిరంజీవి, పూర్తిగా సినిమాలపైనే దృష్టి పెట్టిన మాట వాస్తవం. రాజకీయాలపై తనకు మళ్ళీ ఆసక్తి ఏర్పడటం కష్టమేనని అంటున్నారాయన. చిరంజీవి ఎంత క్లారిటీ ఇస్తున్నా, ఆయన చుట్టూ ఊహాగానాలు మాత్రం అలాగే కొనసాగుతున్నాయి.

ఇదిలా వుంటే, ఈ నెల 30వ తేదీన జనసేన పార్టీ విస్తృత స్థాయి సమావేశం జరగబోతోంది. ఈ సమావేశంలో పార్టీ పలు కీలక నిర్ణయాలు తీసుకుంటుందట. అయితే, ఇందులో చిరంజీవి మూడు రాజధానులకు మద్దతు ప్రకటించడంపై చర్చ జరుగుతుందా.? లేదా.? అన్నదానిపై భిన్న స్వరాలు విన్పిస్తున్నాయి. ‘ఇక్కడ చిరంజీవిని జనసేన పార్టీతో సంబంధం లేని వ్యక్తిగానే చూడాలి.. ఆయన వ్యాఖ్యల్ని జనసేన పార్టీ తీవ్రంగా పరిగణించడంలేదు..’ అని జనసేన వర్గాలు చెబుతున్నాయి.

మరోపక్క, వైఎస్సార్‌ కాంగ్రెస్‌ పార్టీ మాత్రం, చిరంజీవి మీద చాలా చాలా మమకారం ప్రదర్శించేస్తుండడం గమనార్హం. ఒకవేళ చిరంజీవి గనుక, తన పేరుతో చలామణీలో వున్న ప్రెస్‌నోట్స్‌ నిజం కాదని చెబితే, ఆ తర్వాత సీన్‌ మొత్తం మారిపోతుంది. ఇప్పటిదాకా చిరంజీవి భజన చేసిన వైసీపీ నేతలు, వైసీపీ మీడియా ఆయన మీద విషం చిమ్మడానికి పెద్దగా సమయం తీసుకునే అవకాశం లేదు. ‘చిరంజీవిని ప్రజా వ్యతిరేకి’గా చిత్రీకరించడానికి వైసీపీ నేతలు, వైసీపీ మీడియా పోటీ పడడం ఖాయం.

అత్యంత విశ్వసనీయ వర్గాల సమాచారం ప్రకారం, రాజకీయ వ్యవహారాల గురించి చిరంజీవి అస్సలేమాత్రం ఆలోచించడంలేదట. ప్రస్తుతం పూర్తిగా ఆయన తన తదుపరి సినిమా మీదనే ఫోకస్‌ పెట్టినట్లు తెలుస్తోంది.