చంద్రబాబు.. గంట మోగుతోంది జాగ్రత్త..

అసలే ప్రతిపక్షంలో ఉన్నారు. పదవులు లేవు. అధికారం చెలాయించిన చేతులు ఊరుకుంటాయా చెప్పండి. గోడ దూకేసి అధికార పార్టీలో ఏదోలా కుదురుకుని కనీసం చిన్న పదవైనా దక్కించుకుంటేగాని ఆ దురద తగ్గదు. అందుకే చాలామంది అధికారంలో ఏ పార్టీ ఉంటె ఆ పార్టీలోకి జంప్ కావడానికి ముందు నుంచే ప్లాన్ చేసుకుంటూ ఉంటారు. ఏదో విధంగా గొడవపెట్టుకొని బయటపడుతుంటారు.

రాజకీయాలంటే ఇలానే ఉంటాయి మరి. గంట ఎలా బయటకు వెళ్లాలా అని చూస్తున్న తరుణంలో… వెతకబోయే తీగ కాళ్లకు తగిలినట్టుగా జగన్ ప్రకటించిన విశాఖ కార్యనిర్వాహక రాజధాని ఆసరాగా కనిపించింది. జంప్ కావడానికి సిద్ధంగా ఉన్న వ్యక్తికి ఓ చిన్నదుంగ దొరికినా చాలు. దాన్ని పట్టుకొని ఒడ్డుకు చేరుకుంటారు. ఇప్పుడు గంట ఇదే చేయబోతున్నట్టు వార్తలు అందుతున్నాయి. నిన్నటి రోజున విశాఖలో ఉత్తరాంధ్ర టీడీపీ నేతలతో సమావేశం పెట్టుకున్నారు.

జగన్ తీసుకున్న విశాఖ రాజధాని నిర్ణయానికి జై కొట్టారు. ఎలాగో గంట విశాఖ ఎమ్మెల్యేనే కావడం బాగా కలిసి వచ్చింది. తానొక్కడే కాకుండా విశాఖ నుంచి భారీ ఎత్తున నేతలను టీడీపీ నుంచి వైకాపాలోకి తోలేందుకు సిద్ధం అవుతున్నారు. ఈరోజు ఉదయం విశాఖ అర్బన్ టీడీపీ ప్రెసిడెంట్ ఎస్ ఏ రెహ్మాన్ పార్టీకి, పార్టీ పదవికి రాజీనామా చేశారు.

రాజీనామా చేస్తూ బాబు గురించి దారుణంగా మాట్లాడారు. జగన్ కు జై కొట్టారు. చెప్పేదేముంది షరా మామూలే. జగన్ విశాఖ కార్యనిర్వాహక రాజధాని ఇచ్చారు. ఈ ప్రాంతం అభివృద్ధి జరుగుతుంది. టీడీపీలో ఉంటె ఈ నిర్ణయాన్ని వ్యతిరేకించాలి. కాబట్టి రాజీనామా చేస్తున్నట్టు చెప్పారు. పైగా కమ్యూనిటీ విధానం కూడా చూపించాడు.

ఎన్ఆర్సికి జగన్ వ్యతిరేకంగా మాట్లాడటం కూడా నచ్చిందని అన్నాడు. విశాఖ నుంచి టీడీపీ తరపున ఒక వికెట్ పడిపోయింది. నెక్స్ట్ లైన్లో గంట తో సహా చాలామంది ఉన్నారు. ఇందులో బాలయ్య చిన్నల్లుడు కూడా ఉంటారని అంటున్నారు. ఇందులో ఎంతవరకు నిజం ఉందొ తెలియాలి.