మెగాస్టార్ బర్త్ డే స్పెషల్స్: బాక్సాఫీస్ లెక్కలు మార్చేసిన చిరంజీవి ‘అడవి దొంగ’

తెలుగు సినిమాని తన ఫైట్లు, డ్యాన్సులతో పరుగులు పెట్టించారు చిరంజీవి. దీంతోపాటే కమర్షియల్ లెక్కలనూ మార్చేశారు. తన సినిమా కలెక్షన్లతో బాక్సాఫీస్ లెక్కల్ని కొత్తగా రుచి చూపించారు. ఆచార్య ప్రీరిలీజ్ ఈవెంట్ లో నిర్మాత నిరంజన్ రెడ్డి.. ‘కోటి, రెండు, మూడు, నాలుగు, ఐదు కోట్ల కలెక్షన్లను మొదట పరిచయం చేసింది.. ధియేటర్లు పెరగడానికి.. ఎందరో సినిమా వ్యాపారం చేయడానికి చిరంజీవి సినిమాలు.. వాటి కలెక్షన్లే కారణం’ అని గుర్తు చేశారు. 80వ దశకంలో చిరంజీవి సినిమాల వసూళ్లు ఇలానే ఉండేవి. అలాంటి సినిమాల్లో చిరంజీవికి మరో కమర్షియల్ హిట్ ఇచ్చి సరికొత్త కలెక్షన్ల లెక్కల్ని రుచి చూపిన సినిమా ‘అడవిదొంగ’. క్యారెక్టర్ ఓరియంటెడ్ పాత్ర టార్జన్ గా చిరంజీవి తనను తాను సరికొత్తగా ఆవిష్కరించుకున్నారు.

టార్జన్ పాత్రలో..

అప్పటికే చిరంజీవి సినిమాలు ఇండస్ట్రీకి వరంలా మారాయి. చిరంజీవి కోసం ప్రేక్షకులు ధియేటర్లకు క్యూలు కడుతున్నారు. ఫ్యాన్స్ అసోసియేషన్లు, చిరంజీవి డేట్స్ ఇస్తారా అని నిర్మాతలు, అవకాశం ఇస్తారా అని ఎదురు చూసే దర్శకులు, చిరంజీవి చుట్టూ వాతావరణం ఇదే. ఆ సమయంలో పరుచూరి సోదరులు టార్జన్ బేస్డ్ కథను చిరంజీవి దృష్టికి తీసుకెళ్లడం ఆయనకు కథ నచ్చి ఒప్పుకోవడం జరిగింది. చిరంజీవి డేట్స్ గోపీ ఆర్ట్ పిక్చర్స్ చలసాని గోపి సంపాదించారు. దర్శకేంద్రుడు కె.రాఘవేంద్రరావు ఆ సమయంలో టాప్ మోస్ట్ క్రేజీ డైరక్టర్. అప్పటికే రేసుగుర్రంలా దూసుకెళ్తున్న చిరంజీవితో ఆయనకు ఇదే మొదటి బ్లాక్ బస్టర్ సినిమా. దీంతో సినిమాపై అంచనాలు పెరిగాయి.

సింహంతో ఫైట్ హైలైట్..

కథగా ఇది కూడా రివెంజ్ డ్రామానే. అడవిలో జంతువుల మధ్య టార్జన్ లా పెరిగిన వ్యక్తిని తల్లి గుర్తించి విద్యాబుద్ధులు నేర్పించి విలన్లపై ప్రతీకారం తీర్చుకునే కథ. అడవి దొంగగా చిరంజీవి మేకోవర్ అదిరిపోయింది. అడవి నేపథ్యంలో చిరంజీవిని చూసి చిన్న పిల్లలు కేరింతలు కొట్టారు. ఫైట్లతో ఫ్యాన్స్ ఊగిపోయారు. అడవిలో సింహంతో చిరంజీవి ఫైట్ సినిమాకే మేజర్ హైలైట్. చిరంజీవి హావభావాలు, రౌద్రం నిజంగా సింహంతో చిరంజీవి ఫైట్ చేసినట్టుగా.. ఇద్దరు సమఉజ్జీల పోరాటంగానే చూశారు. సినిమాకు మరో ప్రధాన ఆకర్షణ చక్రవర్తి సంగీతం. ప్రతీపాట సూపర్ హిట్టే. పాటలు, చిరంజీవి డ్యాన్సులు ధియేటర్లను మోత మోగించేశాయి. పాటల స్పెషలిస్టు రాఘవేంద్రరావు చిత్రీకరణ.. చిరంజీవి-రాధ డ్యాన్సులు ప్రేక్షకులకు చక్కిలిగింతలే పెట్టాయి.

క్రేజీ కాంబినేషషన్ కు నాంది..

1985 నవంబర్ 19న విడుదలైన ఈ సినిమా అప్పటివరకూ చిరంజీవి సినిమాల బాక్సాఫీస్ కలెక్షన్లకు అడవి దొంగ సరికొత్త బెంచ్ మార్క్ సెట్ చేసింది. చిరంజీవికి తొలిసారిగా 31 కేంద్రాల్లో శతదినోత్సవం జరుపుకున్న సినిమాగా నిలిచింది. కలెక్షన్ తుఫాను సృష్టించిన ఈ సినిమా చెన్నై విజయా శేష్ మహాల్ లో శతదినోత్సవ సంబరం చేశారు. హిందీ లెజండరీ హీరో దిలీప్ కుమార్ ముఖ్య అతిధిగా వేడుకలు జరిపారు. ఈ సినిమా నుంచి చిరంజీవికి లక్కీ దర్శకుడిగా కె.రాఘవేంద్రరావు కూడా చేరిపోయి ఆ తర్వాత ఎన్నో హిట్స్ కు అడవి దొంగతో నాంది పలికారు. చిరంజీవికి రాధ సరిజోడు అనేది మరోసారి అడవి దొంగ నిరూపించింది.