మాకొద్దీ ఆంధ్రప్రదేశ్: సీఎం వైఎస్ జగన్ తక్షణ కర్తవ్యమేంటి.?

ఔను, తెలంగాణ మంత్రి పువ్వాడ అజయ్ కుమార్ చెబుతున్నట్లు, పోలవరం ప్రాజెక్టు విలీన మండలాల్లో పరిస్థితులు మారుతున్నాయి. అక్కడి ప్రజా ఉద్యమం ఉధృతమవుతోంది. ‘మాకొద్దీ ఆంధ్రప్రదేశ్’ అని ఐదు గ్రామాల ప్రజలు నినదించడం, ఆయా గ్రామ పంచాయితీలు తీర్మానించడం.. రాజకీయంగా కాక రేపుతోంది. అంతే కాదు, ఈ పెగలు పక్కనున్న ప్రాంతాలకూ పాకుతున్నాయి.!

పోలవరం ప్రాజెక్టు నిర్మాణ నిమిత్తం ‘ముంపు ప్రాంతం’ పేరుతో అంతకు ముందు వరకూ తెలంగాణలో వున్న కొంత భూభాగాన్ని, ఉమ్మడి తెలుగు రాష్ట్రం విభజనతో, ఆంధ్రప్రదేశ్ రాష్ట్రంలో కలిపారు. ఇది అందరికీ తెలిసిన విషయమే. ఇందులో కొత్తగా మాట్లాడుకోవాల్సిందేమీ లేదు.

అయితే, గోదావరి నదికి ఇటీవలికాలంలో కనీ వినీ ఎరుగని స్థాయిలో వరద రావడంతో, విలీన మండలాల్లో పరిస్థితులు దారుణంగా తయారయ్యాయి. ఆంధ్రప్రదేశ్ రాష్ట్రంలో కొత్త జిల్లాలు ఏర్పాటవకముందూ, విలీన మండలాల్లో పరిస్థితులు దుర్భరంగానే వున్నాయి. ఇప్పుడు పరిస్థితి మరింత దుర్భరంగా మారింది.

నిజానికి, ఉమ్మడి తెలుగు రాష్ట్రంలోనూ వారి వెతలు అన్నీ ఇన్నీ కావు. కాకపోతే, అప్పట్లో చిన్న చిన్న అవసరాల కోసం భద్రాచలం వెళ్ళేందుకు వారికి వీలుగా వుండేది. ఇప్పుడూ వెళ్ళొచ్చు. కాకపోతే, ప్రభుత్వం అందించే సాయం పొందడానికి అప్పట్లో వారికి సమస్య లేదు. ఇప్పుడు అదో పెద్ద సమస్యగా మారిపోయింది. ఆంధ్రప్రదేవ్ భూభాగం గనుక, తెలంగాణ అధికారులు పట్టించుకోరు. ఆంధ్రప్రదేశ్ అధికారులేమో విలీన మండలాల ప్రజలకు అందుబాటులో వుండరు.

పోలవరం ప్రాజెక్టు అంటే, పశ్చిమగోదావరి జిల్లా – తూర్పుగోదావరి జిల్లాల్ని పోలవరం అనే గ్రామం దగ్గర కలిపే ప్రాంతం మాత్రమే కాదు. పోలవరం ప్రాజెక్టు ఎగువన ‘ముంపు బాధితులు’గా మారేవారందరి ప్రయోజనాలూ ఈ ప్రాజెక్టుతో ముడిపడి వున్నాయి. ప్రాజెక్టు దగ్గరే అత్యంత ఎత్తయిన వైఎస్సార్ విగ్రహాన్ని పెడతామంటున్న వైసీపీ నాయకులు, పోలవరం ముంపు ప్రాంతాల ప్రజల వెతల గురించి ఏనాడూ ఆలోచించలేదు.

ఈ కారణంగానే, ‘మాకొద్దీ ఆంధ్రప్రదేశ్’ అన్న డిమాండ్ తెరపైకొచ్చింది. ముఖ్యమంత్రి హోదాలో వైఎస్ జగన్, ఈ నినాదం పట్ల స్పందించాల్సిన రీతిలో స్పందించకపోవడం శోచనీయం.