చైనా తొండాట: లడఖ్ లో చర్చలు.. అరుణాచల్లో మోహరింపులు.!

ప్రపంచవ్యాప్తంగా ఎంతగా వ్యతిరేకత వ్యక్తమవుతున్నా.. చైనా తన తీరు మార్చుకోవడంలేదు. సరిహద్దుల్లో బలగాల ఉపసంహరణకు సిద్ధమని చెబుతూనే వేల సంఖ్యలో సైనికులను మోహరిస్తోంది. ఈ విషయంలో అది కొత్త వ్యూహానికి తెర తీసింది. లడఖ్ లో బలగాల ఉపసంహరణకు సంబంధించిన చర్చలు ఇంకా కొలిక్కి రాలేదు. ఓ వైపు వెనక్కి వెళ్లడానికి సిద్ధమని చర్చల్లో చెబుతున్నా.. క్షేత్ర స్థాయిలో మాత్రం అందుకు విరుద్ధంగా వ్యవహరిస్తోంది. ఫింగర్-5 దగ్గర బలగాలు తిష్ట వేసుకుని ఉండటమే కాకుండా ఇటీవల ఘర్షణలు చోటుచేసుకున్న ప్రాంతాల్లో భారీ నిర్మాణాలు చేపట్టింది.

లడఖ్ లో పరిస్థితి ఇలా కొనసాగుతుండగా.. తాజాగా అరుణాచల్ ప్రదేశ్ పై డ్రాగన్ దృష్టి పెట్టింది. ఎప్పటినుంచో ఆ ప్రాంతం తమదేనని వాదిస్తున్న పొరుగుదేశం.. అరుణాచల్ ప్రదేశ్ లోని మెక్ మోహన్ రేఖ వైపు దాదాపు 40 వేల మంది సైనికులను మోహరించింది. మెక్ మోహన్ రేఖను గుర్తించిన చైనా.. అరుణాల్ ప్రదేశ్ లోని దాదాపు 65వేల చదరపు కిలోమీటర్ల భూభాగం తమదేనని వాదిస్తోంది. ఈ నేపథ్యంలో అక్కడ భారీగా సైన్యాన్ని మోహరించడం ద్వారా కయ్యానికి కాలు దువ్వుతోంది. అయితే, ఇది డ్రాగన్ కొత్త ఎత్తుగడగా కొందరు పేర్కొంటున్నారు. లడఖ్ తో పోలిస్తే అరుణాచల్ ప్రదేశ్ వద్దనున్న భూభాగం చైనాకు అనుకూలంగా ఉంటుంది. లడఖ్ వద్ద భౌగోళిక పరిస్థితులు మనకు అనుకూలం కాగా, అరుణాచల్ వద్ద పరిస్థితులు డ్రాగన్ కు సానుకూలంగా ఉంటాయి.

ఈ నేపథ్యంలో అక్కడ కయ్యానికి కాలు దువ్వడం ద్వారా భారత సైనికులను అటువైపు తరలేలా చేయాలన్నదే డ్రాగన్ వ్యూహంగా కనిపిస్తోందని అంటున్నారు. ఒకవేళ భారత సైన్యం అటు తరలితే అప్పుడు లడఖ్ వద్ద చొచ్చుకు రావాలన్నదే చైనా ఎత్తుగడ అయి ఉండొచ్చని అభిప్రాయపడుతున్నారు. ఈ కారణంతోనే లడఖ్ నుంచి చైనా సేనలు వెనక్కి వెళ్లడంలేదని పేర్కొంటున్నారు. మరోవైపు చైనాకు దీటుగా బదులిచ్చేందుకు భారత్ కూడా సిద్ధమవుతోంది. అరుణాచల్ వద్ద భారీగా మన సేనలను మోహరిస్తోంది. ఎలాంటి పరిస్థితులనైనా ఎదుర్కొనేందుకు సన్నద్ధంగా ఉంది.