చంద్రబాబు అక్కడా ‘జెండా’ పీకెయ్యాల్సిందే

ఎట్టి పరిస్థితుల్లోనూ తెలుగుదేశం పార్టీ అధినేత నారా చంద్రబాబు నాయుడు అభ్యర్థన పట్ల సానుకూలంగా స్పందించకూడదనే నిర్ణయానికి వచ్చారట ఆంధ్రప్రదేశ్‌ ముఖ్యమంత్రి వైఎస్‌ జగన్‌ మోహన్‌ రెడ్డి. అదే, చంద్రబాబు ప్రస్తుతం నివాసంగా ఉపయోగిస్తున్న భవనం, ఆ పక్కనే ఏర్పాటు చేసుకున్న ప్రజా వేదిక విషయంలో. అవి రెండూ చంద్రబాబు తన హయాంలో సమకూర్చుకున్నవే. నిబంధనలకు విరుద్ధంగా నిర్మించారని తెలిసీ, చంద్రబాబు కృష్ణా నది ఒడ్డున వున్న భవనాన్ని అధికారిక నివాసంగా వినియోగించుకోవడమే పెద్ద తప్పు. ఇప్పుడు ఆ తప్పిదానికి ‘రైట్‌’ సర్టిఫికెట్‌ ఇవ్వాలన్నట్టుగా చంద్రబాబు ఇటీవల వైఎస్‌ జగన్‌ మోహన్‌ రెడ్డికి లేఖ రాసిన విషయం తెల్సిందే.

‘ముమ్మాటికీ అది అక్రమ కట్టడమే. ఈ విషయంలో మా విధానం మారలేదు. వైఎస్‌ జగన్‌ ఎట్టి పరిస్థితుల్లోనూ ఆ భవనం విషయంలో చంద్రబాబు లేఖ పట్ల సానుకూలంగా స్పందించరు’ అని ఇప్పటిక వైసీపీ నేతలు క్లారిటీ ఇస్తున్న దరిమిలా, చంద్రబాబుని అక్కడినుంచి ఖాళీ చేయించడానికే వైఎస్‌ జగన్‌ నిర్ణయం తీసుకున్నట్లు కన్పిస్తోంది.

మరోపక్క, అధికార పార్టీ ఉద్దేశ్యమేంటో ఆ పార్టీకి చెందిన మీడియాలో కథనాల ద్వారా తేటతెల్లమైన దరిమిలా, ‘జెండా’ పీకెయ్యక తప్పదన్న విషయాన్ని తెలుగుదేశం పార్టీ అధినేత కూడా గుర్తించారట. వీలైనంత త్వరగా చంద్రబాబు తన నివాసాన్ని ఉండవల్లి నుంచి మార్చేయబోతున్నారన్నది తాజా ఖబర్‌. అయితే, ప్రభుత్వం నుంచి స్పందన వచ్చే వరకూ వేచి చూడాలంటూ కొందరు టీడీపీ నేతలు చంద్రబాబుకి సూచిస్తున్నారట.

ఈ నెల 12 నుంచి అసెంబ్లీ సమావేశాలు జరగనున్న దరిమిలా, ఈ సమావేశాల్లో దీన్నొక ఎజెండా అంశంగా మార్చి, అధికార పక్షంపై విమర్శల బాణాలు ఎక్కుపెట్టాలని తెలుగుదేశం పార్టీ భావిస్తున్నట్లు సమాచారమ్‌. అయితే, దానికి తగ్గట్టుగా ఎదురుదాడికి వైఎస్సార్సీపీ కూడా సన్నాహాలు చేసుకుంటోంది. విమర్శలు, ప్రతి విమర్శల సంగతి పక్కన పెడితే, చంద్రబాబు ఇంటి కిందకీ ఇప్పుడు నీళ్ళు వచ్చేసిన మాట వాస్తవం. హుందాగా ఆయనే తనంతట తానుగా ఇంటిని మార్చేస్తే మంచిది. లేదంటే, బలవంతంగా ప్రభుత్వం అక్రమ కట్టడం నుంచి చంద్రబాబుని ఖాళీ చేయిస్తే అది మాజీ ముఖ్యమంత్రికి మరింత అవమానకరం.