చంద్రబాబు తెలివి.! వెన్నుపోటుకి బాలయ్యతోనే కొత్త అర్థం చెప్పించిన వైనం.!

‘కాళ్ళు పట్టుకుని బతిమాలినా వినలేదు..’ అంటూ ఆనాటి వెన్నుపోటు ఘటనపై తెలుగుదేశం పార్టీ అధినేత నారా చంద్రబాబునాయుడు తాజాగా ఓ టాక్ షోలో సంచలన వ్యాఖ్యలు చేశారు. ఆ టాక్ షో నిర్వహిస్తున్నది కూడా స్వర్గీయ ఎన్టీయార్ తనయుడు నందమూరి బాలకృష్ణ కావడం గమనార్హం.
‘అన్‌స్టాపబుల్ రెండో సీజన్’ తొలి గెస్ట్ నారా చంద్రబాబునాయుడు ఎందుకు అయ్యారు.? అన్నది నందమూరి బాలకృష్ణకే తెలియాలి. రాజకీయాల్లో టాలెస్ట్ పర్సనాలిటీ.. అంటూ బావ చంద్రబాబుని నందమూరి బాలకృష్ణ ప్రమోట్ చేసిన వైనం, హైద్రాబాద్‌ని సరికొత్తగా నిర్మించింది చంద్రబాబేనని బాలయ్య చెప్పిన వైనం.. ఇవన్నీ కేవలం తెలుగుదేశం పార్టీకి జాకీలేయడానికే అన్నట్లు తయారైంది పరిస్థితి.

చెరిపేసుకోవాలనుకుంటే చెరిగిపోయే మచ్చ కాదు ‘వెన్నుపోటు’ అంటే. చంద్రబాబు, దానికి ఏ అర్థమైనా చెప్పి వుండొచ్చుగాక, ఎలాగైనా బుకాయిస్తుండొచ్చుగాక.. ఆ వ్యవహారంలో బాధితుడైన ఎన్టీయార్ స్వయానా కంటతడి పెడుతూ, తన అల్లుడు తనకు పొడిచిన వెన్నుపోటు గురించి చెప్పాక.. ఆనాటి ఆ పాపం సమసిపోదు. అయినాగానీ, చంద్రబాబు తాను చెయ్యగలిగిన ప్రయత్నాలన్నీ చేస్తున్నారు ఆ ‘వెన్నుపోటు’ మచ్చని చెరిపేసుకునేందుకు. ‘మనమందరం కలిసి ప్రయత్నించాం..’ అంటూ ఆనాటి ఆ వెన్నుపోటు ఘటనపై బాలయ్యతో చంద్రబాబు టాక్ షో ద్వారా చెప్పడం.. బాలయ్యకు చెబుతున్నట్టు కాదు, రాష్ట్ర ప్రజలకు చంద్రబాబు సంకేతాలు ఇస్తున్నట్లయ్యింది.

స్వర్గీయ ఎన్టీయార్ తనయుడు బాలయ్యే ‘మనం ప్రయత్నించాం..’ అని ఒప్పుకుంటున్నప్పుడు, ఎవరికైనా ఆ వెన్నుపోటు విషయంలో ఇబ్బంది ఏముంటుంది.? అనే చర్చ ఇప్పుడు షురూ అయ్యింది. వావ్ బాలయ్యా.! టాక్ షోని ఇలాక్కూడా వాడొచ్చా.? అని అంతా ఆశ్చర్యపోతున్నారు. స్వర్గీయ ఎన్టీయార్ చివరి రోజుల్లో ఆయన వెంట ఎవరూ లేరు, ఒక్క లక్ష్మీపార్వతి తప్ప. ఆమె ఏ ప్రయోజనాల్ని ఆశించి ఆయనతో ఆ సమయంలో వున్నారు.? అన్నది వేరే చర్చ. కడుపున పుట్టిన పిల్లలెవరూ ఆ పరిస్థితుల్లో ఎన్టీయార్‌ని ఆదుకోలేకపోయారు.! చెరిపేస్తే చెరిగిపోయే చరిత్ర కాదు. ‘మా బ్లడ్డు వేరు.. మా బ్రీడు వేరు..’ అంటుంటారు బాలయ్య. ‘మా వంశం..’ అంటుంటారాయన. ఆ వంశానికి మూల పురుషుడైన ఎన్టీయార్ చివరి రోజుల్లో ఇప్పుడు వంశం గురించి గొప్పలు చెప్పేవాళ్ళెవరూ ఎందుకు లేరు.?