ఊహించిందే.! పవన్ కళ్యాణ్ ఇప్పటం పర్యటనపై కేసు నమోదు.!

జనసేన అధినేత పవన్ కళ్యాణ్ మీద పోలీస్ కేసు నమోదయ్యింది.! తెనాలికి చెందిన శివ అనే వ్యక్తి తాడేపల్లి పోలీస్ స్టేషన్‌లో జనసేన అధినేత మీద ఫిర్యాదు చేశాడు.

నవంబర్ 5వ తేదీన పవన్ కళ్యాణ్ మంగళగిరి నుంచి ఇప్పటం వెళుతూ వాహనం మీద ప్రమాదకరమైన రీతిలో కూర్చున్నారనీ, ఆయన కాన్వాయ్ వేగంగా వెళ్ళడం వల్ల తనకు ప్రమాదం సంభవించిందనీ, బైక్ మీద నుంచి పడిపోయానని సదరు వ్యక్తి శివ పోలీసులకు చేసిన ఫిర్యాదులో పేర్కొన్నాడట.

పోలీసులు అందుకున్న పోలీసులు మోటర్ వెహికల్స్ యాక్ట్ 177, ఐపీసీ 336 సెక్షన్ కింద కేసు నమోదు చేశారట. పవన్ కళ్యాణ్ అలాగే పవన్ కళ్యాణ్ ప్రయాణించిన వాహనాన్ని నడుపుతున్న డ్రైవర్ మీద పోలీసులు కేసు నమోదు చేసినట్లు తెలుస్తోంది. పవన్ కళ్యాణ్ నిర్లక్ష్యం వల్లనే తాను బైక్ మీద నుంచి పడ్డానని ఫిర్యాదులో శివ పేర్కొనడం గమనార్హం.

ఇప్పటం గ్రామ ప్రజలు, జనసేన పార్టీ ఆవిర్భావ వేడుక జరుపుకునేందుకు తమ భూముల్లో అవకాశం కల్పిచిన సంగతి తెలిసిందే. అది గిట్టని వైసీపీ, ఇప్పటం గ్రామంపై కొరడా ఝుళిపించింది. బస్సులు కూడా రాని గ్రామానికి ఏకంగా 120 అడుగుల మేర రోడ్లను వెడల్పు చేయాలని సంకల్పించింది. ఆ వంకతో, జనసేన మద్దతుదారులు.. అందునా, కాపు సామాజిక వర్గానికి చెందినవారి ఇళ్ళను కూల్చివేశారనేది ప్రధాన ఆరోపణ.

ఈ క్రమంలో జనసేన అధినేత ఇప్పటం వెళ్ళారు. బాధితుల్ని పరామర్శించారు. అంతే కాదు, బాధిత కుటుంబాలకి లక్ష రూపాయల చొప్పన ఆర్థిక సాయమూ ప్రకటించారు. అంతకు ముందు తమ పార్టీ ఆవిర్భావ సభకు సహకరించిన ఇప్పటం గ్రామ అభివృద్ధికి 50 లక్షల రూపాయల సాయం ప్రకటించారు జనసేనాని.

ఆ సొమ్ముల్ని వైఎస్సార్ కళ్యాణ మండపానికి ఇచ్చేయాలంటూ అధికార పార్టీ ఒత్తిడి తీసుకురాగా, దాన్ని గ్రామస్తులు, అధికార పార్టీ ఒత్తిళ్ళను లెక్క చేయలేదు.

ఇదిలా వుంటే, ఇప్పటం వెళ్ళే క్రమంలో జనసేనానిని అదుపు చేయడానికి మంగళగిరి పార్టీ కార్యాలయం వద్ద పోలీసులు ప్రయత్నించారు. దాంతో, జనసేనాని ఆగ్రహం వ్యక్తం చేస్తూ, కొంత దూరం కాలి నడకన వెళ్ళారు. ఆ తర్వాత పోలీసులు దిగొచ్చారు. దాంతో, వాహనంపైకెక్కి కూర్చుని.. అలాగే ఇప్పటం గ్రామం వరకూ వెళ్ళారు జనసేనాని.

దీనిపై నేసనల్ మీడియాతో మాట్లాడిన కొందరు వైసీపీ మంత్రులు, పవన్ కళ్యాణ్‌పై కేసులు నమోదు చేయాలని పోలీసుల్ని ఆదేశించినట్లూ చెప్పారు. ఆ ఆదేశాలకు అనుగుణంగానే ఫిర్యాదుదారుడ్ని పోలీసులు రంగంలోకి దించినట్లున్నారన్నది జనసేన విమర్శ. సినిమా స్టోరీని మించిపోయింది కదా.. ఈ పోలీస్ కేస్ హంగామా.! మరి, ఈ కేసు విషయమై జనసేనాని రియాక్షన్ ఎలా వుంటుందో ఏమో.!