చేతులో జోడించి ‘దండం’ పెట్టే పరిస్థితెందుకు వచ్చింది జగన్ సారూ.!

‘మీతో మా బంధం రాజకీయాలకు అతీతం..’ అంటూ ప్రధాన మంత్రి నరేంద్ర మోడీని ఉద్దేశించి ముఖ్యమంత్రి వైఎస్ జగన్ మోహన్ రెడ్డి వ్యాఖ్యానించారు. అంతే కాదు, చేతులు జోడించి మొక్కి ‘మీ ఆశీస్సులు కావాలి’ అని కూడా అడిగారు.!

ప్రత్యేక హోదా కోసం తమ ఎంపీలతో రాజీనామా చేయించి, తాను ఆమరణ నిరాహార దీక్షకు దిగిన వైఎస్ జగన్ మోహన్ రెడ్డి ఎక్కడ.? విభజన హామీలు నెరవేర్చండి మహాప్రభో.. అంటూ చేతులు జోడించి, నమస్కరిస్తున్న వైఎస్ జగన్ మోహన్ రెడ్డి ఎక్కడ.? ఆ జగన్ మోహన్ రెడ్డికీ, ఈ జగన్ మోహన్ రెడ్డికీ ఏంటి తేడా.?

‘మేం కేంద్రం మెడలు వంచి ప్రత్యేక హోదా తెస్తాం..’ అని ఇదే వైఎస్ జగన్ మోహన్ రెడ్డి నినదించారు. నిజానికి, ఆ పౌరుషం.. ఆ తెగువ.. కేవలం అధికారం కోసం వేసిన ఎత్తుగడ తప్ప, వాటిల్లో నిజాయితీ లేదు. అందుకే, అప్పుడు మెడలు వంచేస్తామని చెప్పి.. ఇప్పుడు మెడలు వంచేసుకుని ‘ఆశీస్సులు’ కోరుతున్నారన్నది సర్వత్రా వినిపిస్తోన్న వాదన.

ఒక విషయంలో ముఖ్యమంత్రి వైఎస్ జగన్ మోహన్ రెడ్డిని అభినందించాలి. అదేంటంటే, విశాఖ వేదికగా ప్రధాని సమక్షంలోనే ప్రత్యేక హోదా సహా పలు అంశాల్ని వైఎస్ జగన్ మోహన్ రెడ్డి ప్రస్తావించారు మరి. ఎనిమిదేళ్ళ క్రితం తగిలిన గాయంతో ఆంధ్రప్రదేశ్ విలవిల్లాడుతోందనీ, ఇంకా ఆ గాయం నుంచి కోలుకోలేదని వైఎస్ జగన్ చెప్పారు.

‘మీరు అదనంగా ఇచ్చే ప్రతి రూపాయీ రాష్ట్రానికి ఉపయోగపడుతుంది.. ఎంతో మేలు చేస్తుంది..’ అని ప్రధానిని ఉద్దేశించి వ్యాఖ్యానించారు వైఎస్ జగన్.

అదనంగానా.? అదెలా వుంటుంది.? రాష్ట్రానికి ప్రత్యేక హోదా రావాలి.. రాలేదు.! రైల్వే జోన్ రావాలి.. వస్తుందో లేదో తెలియదు.! కడప స్టీలు ప్లాంటు, దుగరాజపట్నం పోర్టు.. వీటి విషయంలో కేంద్రం పట్టించుకోవడంలేదు. పైగా, విశాఖ స్టీలు ప్లాంటుని అమ్మేసుకుంటోంది కేంద్రం. అదనంగా రావడం సంగతి దేవుడెరుగు.. వున్నవాటినీ కేంద్రం లాక్కుంటోందాయె.!

అయినాగానీ, ఆనాటి చేవ చచ్చిపోయింది వైఎస్సార్ కాంగ్రెస్ పార్టీలో. అధికారం వస్తే.. బలం పెరగాలి.. ఇంకాస్త ధైర్యం ప్రదర్శించాలి. తెగువ చూపించాలి. చేతులు జోడించిన నమస్కరించే స్థాయికి పడిపోవడమేంటి.? ఎక్కడో తేడా కొడుతోంది కదా.?