తెలుగింటి కోడలి బడ్జెట్‌ ఎలా వుందంటే.!

నిర్మలా సీతారామన్‌.. కేంద్ర ఆర్థిక శాఖ మంత్రి.. ఉన్నత విద్యావంతురాలు. భారతీయ జనతా పార్టీలో క్రమశిక్షణగల కార్యకర్త. ఆమె వాక్చాతుర్యం, విషయ పరిజ్ఞానం, పార్టీ పట్ల ఆమెకున్న అంకిత భావం.. ఇలా ఇవన్నీ ఆమెను కేంద్ర ఆర్థిక మంత్రిని చేశాయి. గతంలో ఆమె కేంద్ర రక్షణ శాఖ మంత్రిగా పనిచేసిన విషయం విదితమే. ఆమె తమిళనాడుకి చెందిన వ్యక్తి అయినా, తెలుగింటి కోడలు. అచ్చ తెలుగులో చాలా స్వచ్ఛంగా మాట్లాడగలరామె. ఓ మహిళ ఆర్థిక శాఖ మంత్రిగా, బడ్జెట్‌ని ప్రవేశ పెట్టడమంటే, ఆ బడ్జెట్‌పై సాటి మహిళా లోకంపై అంచనాలు వుండడం సహజమే. కానీ, ఆమె దేశానికి ఆర్థిక మంత్రి. దేశ ప్రయోజనాల్ని దృష్టిలో పెట్టుకునే బడ్జెట్‌ ప్రవేశపెట్టాలి. ఇంతకీ, నిర్మలా సీతారామన్‌ ప్రవేశపెట్టిన బడ్జెట్‌ ఎలా వుంది.? మహిళలకు అదనపు వరాలు ఏమైనా ఇచ్చారా.? సామాన్యుడికి ఉపశమనమెంత.? ఇలా సవాలక్ష ప్రశ్నలు సామాన్యుల మెదళ్ళలో వుండడం సహజమే.

కానీ, చాచి కొట్టి.. ఆ తర్వాత చెంప మీద చల్లటి నీళ్ళతో తడిమినట్లు.. దేశ బడ్జెట్‌ వుండడం కొత్తేమీ కాదు. ఇప్పుడూ అదే జరుగుతుందని జనం అంచనా వేశారు, అఫ్‌కోర్స్‌.. అదే జరిగిందనుకోండి.. అది వేరే విషయం. బడ్జెట్‌లో సామాన్యుడికి ఊరట గురించి పెద్దగా మాట్లాడుకోవడానికి ఏమీ లేదు. ఆ మాటకొస్తే, చాచి కొట్టారు.. ఉపశమనం మాత్రం లేకుండా పోయింది. ఇంటి రుణాలపై వడ్డీ రాయితీని 2 లక్షల నుంచి మూడున్నర లక్షలకు పెంచడం ఊరటే. కానీ, ఇంటి నిర్మాణంలో ఉపయోగించే పీవీసీ పైపుల దగ్గర్నుంచి, చాలా ఉత్పత్తులపై పన్నుని గణనీయంగా పెంచేశారు.

ఈ ఏడాదిలో పెట్రో ధరలు తగ్గుతాయని కేంద్రం రెండ్రోజుల క్రితమే ప్రకటించింది. ఆ తగ్గుదల సామాన్యుడి జేబుకి అందకుండా అదనపు సెస్‌ విధించింది నిర్మలా సీతారామన్‌ బడ్జెట్‌. చెప్పుకుంటూ పోతే ఇలాంటివి చాలానే వున్నాయి. భారతదేశంలో మహిళలు ఎక్కువగా ఇష్టపడేది బంగారమే. కానీ, ఆ బంగారంపై కస్టమ్స్‌ సుంకం పెరిగింది. సో, బంగారం ధర పెరగనుందన్నమాట.

స్వయం సహాయక సంఘాల్లో వున్న మహిళలకు ముద్ర రుణాల్ని వర్తింపజేయడం ఉపశమనం కిందే భావించాలి. ఊరట తక్కువ, బాదుడు చాలా ఎక్కువ.. అన్నట్లుంది నిర్మలా సీతారామన్‌ బడ్జెట్‌. దేశమంతా, బడ్జెట్‌ తీరు పట్ల అసహనం వ్యక్తం చేస్తోంటే, ప్రధాని నరేంద్ర మోడీ మాత్రం ‘అద్భుతమైన బడ్జెట్‌’ అంటూ కితాబులిచ్చేశారు. ఆయనగారి ప్రభుత్వం ప్రవేశపెట్టిన బడ్జెట్‌ గనుక.. బహు గొప్పగానే వుంటుంది.

ఎయిర్‌ ఇండియాలో వాటాలు తగ్గించుకోవడం ద్వారా ఆ సంస్థ భవిష్యత్తుని కేంద్రం ప్రశ్నార్థకం చేయబోతోంది. మొత్తంగా చూస్తే, దేశ బడ్జెట్‌ సామాన్యుడికి సమస్యలు తెచ్చేలా వుంది తప్ప, సమస్యల నుంచి బయటపడేసేలా లేదన్నది మాత్రం నిర్వివాదాంశం. ఉద్యోగ కల్పనకు గానీ, పారిశ్రామికీకరణకుగానీ ఏమాత్రం ఊతమిచ్చే బడ్జెట్‌ కానే కాదని ఆయా రంగాలకు చెందిన నిపుణులూ అభిప్రాయపడ్తుండడం కొసమెరుపు. మామూలుగా అయితే, బడ్జెట్‌ తర్వాత స్టాక్‌ మార్కెట్లు ఊపందుకోవడం ఈ మధ్య చూస్తున్నాం. కానీ, ఇప్పుడు అనూహ్యంగా స్టాక్‌మార్కెట్లను సైతం బడ్జెట్‌ మెప్పించలేకోపోయింది. సూచీలన్నీ నేలచూపులు చూసేస్తున్నాయ్‌.