బులుగు కామెడీ: వాళ్ళసలు ఉద్యోగులే కాదా.?

వైఎస్సార్ కాంగ్రెస్ పార్టీని అదఃపాతాళానికి తొక్కేయడానికే బహుశా బులుగు మీడియా కంకణం కట్టుకున్నట్టుంది. తెలుగుదేశం పార్టీ అధినేత నారా చంద్రబాబునాయుడిని ఎలాగైతే పచ్చ మీడియా వెన్నుపోటు పొడిచేసిందో, అంతకన్నా దారుణంగా, హేయంగా వైఎస్ జగన్ మోహన్ రెడ్డిని వెన్నుపోటు పొడిచేందుకు బలుగు మీడియా ప్రయత్నిస్తున్నట్టుంది.

పెంచి పోషిస్తోన్న బులుగు మీడియా, అధికార వైసీపీని ముంచేయడానికి ప్రయత్నిస్తోంటే, ఏమీ చేయలేని దయనీయ స్థితిలో వైసీపీ అధిష్టానం వున్నట్లే కనిపిస్తోంది. అమరావతి కోసం రైతులు ఉద్యమిస్తే, దాన్ని పెయిడ్ ఆర్టిస్టులుగా ఇదే బులుగు మీడియా అభివర్ణించింది. బులుగు కార్యకర్తలు ఈ విషయంలో పడరాని పాట్లూ పడ్డారు.

సరే, అమరావతి ఉద్యమం విషయమై తెలుగుదేశం పార్టీ పాత్ర ఎంత.? విపక్షాలు ఎందుకు అమరావతికి మద్దతిస్తున్నాయన్నది వేరే చర్చ. ఉద్యోగుల ఉద్యమం విషయానికొస్తే, ఇందులో ఏ రాజకీయ పార్టీల ప్రమేయం లేదు. అసలు రాజకీయ పార్టీలతో సంప్రదింపులు జరపబోమనీ, ఉద్యోగులు ప్రభుత్వంలో భాగమనీ.. ఉద్యోగ సంఘాలే స్వయంగా చెప్పాయి.

అంతేనా, పీఆర్సీ విషయమై ముఖ్యమంత్రి సాక్షిగా జరిగిన సమావేశం, ఆ తర్వాత ఉద్యోగులు ముఖ్యమంత్రిని పొగిడిన వైనం.. అందరికీ తెలిసిందే. విజయవాడ వేదికగా నిన్న ఉద్యోగులు పెద్దయెత్తున నిరసన కార్యక్రమం నిర్వహించారు. వైసీపీ ప్రభుత్వం అంచనాలు తల్లకిందులయ్యాయి. ప్రజా వ్యతిరేకత ఏ స్థాయిలో వుందో ప్రభుత్వానికి అర్థమయ్యింది.

‘ఉద్యోగులు బలప్రదర్శన చేయడం సరికాదు..’ అంటూ సాక్షాత్తూ ప్రభుత్వ సలహాదారు సజ్జల వ్యాఖ్యానించారు. కానీ, వైసీపీ అనుకూల మీడియా దారి వేరేలా వుంది. ‘టీడీపీ, జనసేన, వామపక్షాలు ఇతర రాజకీయ పార్టీలకు చెందిన కార్యకర్తలే ఆ బల ప్రదర్శనలో పాల్గొన్నారు..’ అంటూ చిత్ర విచిత్ర వాదనను తెరపైకి తెచ్చింది.

బులుగు మీడియాని నమ్మకుంటే, చంద్రబాబు తరహాలోనే వైఎస్ జగన్ మోహన్ రెడ్డి కూడా ప్రజలకు దూరమవ్వాల్సి వస్తుంది. అయినా, వైఎస్ జగన్ ఆదేశాల్లేకుండా బులుగు మీడియా, ఇలాంటి ‘డైవర్షన్ వార్తల్ని’ ప్రచారంలోకి తెస్తుందా.? గతంలో చంద్రబాబు చేసిన తప్పిదమే, ఇప్పుడు వైఎస్ జగన్ కూడా చేస్తున్నారంతే.