రాజకీయ అనిశ్చితిని తమకు అనుకూలంగా మలుచుకోవడంలో రాటుదేలిపోయిన బీజేపీ.. తెలంగాణలోనూ ఆ తరహా వ్యూహం మొదలుపెట్టింది. కర్ణాటకలో విజయవంతంగా రాజకీయాలు చేసి అధికార పీఠాన్ని కైవసం చేసుకున్న ఆ పార్టీ.. తాజాగా మధ్యప్రదేశ్ తోపాటు తెలంగాణపైనా కన్నేసినట్టుగా తెలుస్తోంది. వాస్తవానికి తెలుగు రాష్ట్రాల్లో ప్రభుత్వాలను కూల్చివేసే సీన్ కాషాయదళానికి లేకున్నా.. భవిష్యత్తులో బలపడే దిశగా ఇప్పటినుంచే పావులు కదుపుతున్న సంగతి తెలిసిందే.
రెండు తెలుగు రాష్ట్రాల్లోనూ అధికార పార్టీలకు భారీ మెజార్టీ ఉన్న నేపథ్యంలో కమలనాథులు పప్పులు ఇక్కడ ఉడకడంలేదు. అయితే, నెమ్మది నెమ్మదిగా పార్టీని విస్తరించి తదుపరి ఎన్నికల నాటికి బలీయం కావాలనే ఎత్తుగడతో కమలనాథులు ముందుకు కదులుతున్నారు. రెండు రాష్ట్రాల్లోనూ అక్కడి పరిస్థితులకు తగ్గట్టుగా తమ వ్యూహాలు అమలు చేస్తున్నారు. తాజాగా తెలంగాణలో టీడీపీ నేతలను ఆపరేషన్ ఆకర్ష్ పేరుతో పార్టీలోకి చేర్చుకునే కార్యక్రమాన్ని ముమ్మరం చేసిన బీజేపీ.. అధికార టీఆర్ఎస్ పైనా మైండ్ గేమ్ మొదలుపెట్టింది.
ఆగస్టు రెండో వారంలో పార్టీ జాతీయ అధ్యక్షుడు, కేంద్ర హోంమంత్రి అమిత్ షా తెలంగాణ పర్యటనకు రానున్న నేపథ్యంలో తమ వ్యూహానికి మరింత పదును పెట్టారు. పలువురు టీఆర్ఎస్ ఎమ్మెల్యేలు తమతో టచ్ లో ఉన్నారని, ఎప్పుడైనా వారు బీజేపీలో చేరొచ్చంటూ మహబూబ్ నగర్ మాజీ ఎంపీ జితేందర్ రెడ్డి బాంబు పేల్చారు. కాంగ్రెస్, టీడీపీల నుంచే కాకుండా టీఆర్ఎస్ నుంచి కూడా నేతలు తమ పార్టీలోకి రానున్నారంటూ పేర్కొన్నారు.
‘‘కొంతమంది టీఆర్ఎస్ అసంతృప్త ఎమ్మెల్యేలు మాతో సంప్రదింపులు జరుపుతున్నారు. టీఆర్ఎస్ లో ఉంటే వచ్చే ఎన్నికల్లో తాము గెలుపొందుతామో లేదో అనే అనుమానం వారిలో బలంగా ఉంది. వారంతా ఏ క్షణంలోనైనా బీజేపీలో చేరొచ్చు’’ అని పేర్కొన్నారు. ఇక బీజేపీ జాతీయ ప్రధాన కార్యదర్శి మురళీధర్ రావు మాట్లాడుతూ.. తాము తెలంగాణలో వేగంగా విస్తరిస్తున్నామని చెప్పారు. తమ లక్ష్యం చేరుకునే వరకు ఆగే ప్రసక్తే లేదన్నారు.
ఒక ప్రతిపక్ష పార్టీ ఏమి చేయగలదో తాము చేసి చూపిస్తామని సవాల్ చేశారు. కేసీఆర్ సర్కారుకు ప్రత్యామ్నాయం కోరుకునేవారంతా బీజేపీ వైపు చూస్తున్నారని పేర్కొన్నారు. అయితే, బీజేపీ వ్యాఖ్యలను టీఆర్ఎస్ నేతలు తోసిపుచ్చారు. కేసీఆర్ నాయకత్వంలో తెలంగాణలో బ్రహ్మాండమైన పాలన సాగుతోందని, తమ ఎమ్మెల్యేల్లో అయోమయం సృష్టించేందుకే ఇలా మైండ్ గేమ్ ఆడుతున్నారని విమర్శించారు.
485769 250860Can I just now say that of a relief to locate somebody who truly knows what theyre speaking about online. You truly know how to bring a difficulty to light and function out it crucial. The diet need to see this and appreciate this side on the story. I cant believe youre no more popular since you certainly possess the gift. 506755