నందమూరి బాలకృష్ణ, అనిల్ రావిపూడి కాంబినేషన్ లో వచ్చిన చిత్రం భగవంత్ కేసరి. శ్రీలీల ప్రధాన పాత్ర పోషించిన ఈ చిత్రం ఈరోజే ప్రేక్షకుల ముందుకు వచ్చింది. ప్రోమోలతో ఆసక్తికరంగా అనిపించిన భగవంత్ కేసరి మరి సిల్వర్ స్క్రీన్ మీద ఎలా ఉంది?
కథ:
భగవంత్ కేసరి (బాలకృష్ణ) ఆదిలాబాద్ లో నివసించే ఆదర్శభావాలున్న వ్యక్తి. విజ్జి (శ్రీ లీల)కు కేర్ టేకర్ గా ఉంటాడు భగవంత్. మరోవైపు సంగ్వి ఒక పెద్ద బిజినెస్ మ్యాన్, రాజకీయ నాయకుడి కొడుకు. దేశంలోనే నెం. 1 కావాలనేది సంగ్వి లక్ష్యం. అలాంటి సంగ్వి, డిప్యూటీ సీఎం మధ్య జరిగే ఒక ఇన్సిడెంట్ లో విజ్జి కూడా ఇన్వాల్వ్ అవ్వాల్సి వస్తుంది.
మరి విజ్జిని కేసరి రక్షించుకోగలిగాడా? కేసరి గతం ఏంటి? విజ్జిని కేసరి ఎలా తీర్చిదిద్దాడు వంటివి ఈ చిత్రం చూసి తెలుసుకోవాలి.
నటీనటులు:
భగవంత్ కేసరిలో బాలకృష్ణ తన వయసున్న పాత్రనే చేసాడు. ఈమధ్య కాలంలో సీనియర్ హీరోలు కూడా హీరోయిన్ల వెనక పడటం వంటివి చిరాకు తెప్పిస్తున్న నేపథ్యంలో ఇది ఒక మంచి మార్పు. బాలకృష్ణ లుక్స్ ను కూడా నీట్ గా డిజైన్ చేసారు. తను సంరక్షకుడిగా ఉన్న అమ్మాయి జీవితంలో పైకి రావాలి అని తపనపడే ఒక పాత్ర అది. బాలకృష్ణ ఎప్పటిలానే పవర్ఫుల్ పెర్ఫార్మన్స్ ఇచ్చాడు.
ఇక శ్రీలీల రెగ్యులర్ హీరోయిన్ పాత్ర కాకుండా తన కెరీర్ లో డిఫెరెంట్ గా నిలిచిపోయే పాత్ర చేసింది. తన పెర్ఫార్మన్స్ బాగానే ఉంది. ఇక తన డ్యాన్స్ ల గురించి కొత్తగా చెప్పేదేముంది. కాజల్ కు చిన్న పాత్రే దక్కింది. ఆమె పర్వాలేదు.
అర్జున్ రాంపాల్ రెగ్యులర్ విలనీ చేసాడు. తన పాత్రలో కొత్తదనం లేదు. ఒక ముఖ్యమైన సీరియస్ పాత్రకు కామెడీ ఇమేజ్ ఉన్న మురళీధర్ గౌడ్ ను తీసుకోవడం వల్ల పాత్ర అనుకున్నట్లుగా ప్రోజెక్ట్ అవ్వలేదు.
సాంకేతిక నిపుణులు:
ఒక అత్యంత పల్చనైన స్క్రిప్ట్ ను తీసుకుని దానికి మాస్ ఎలిమెంట్స్, మహిళా సాధికారితను జత చేసాడు. అయితే ఇటు బాలకృష్ణ అభిమానులను, అటు సాధారణ ప్రేక్షకులను పూర్తిగా సంతృప్తి పరచడంలో విఫలమయ్యాడు. స్క్రీన్ ప్లే ఫార్మాట్ ఒక తీరుగా ఉండదు. అనవసరమైన సన్నివేశాలు చాలానే ఉన్నాయి. సెకండ్ హాఫ్ లో వచ్చే స్కూల్ లెక్చర్ సీన్ దీనికి ఉదాహరణ. ఒక మాస్ స్టార్ ను హ్యాండిల్ చేయడంలో విఫలమయ్యాడు రావిపూడి.
థమన్ బ్యాక్ గ్రౌండ్ స్కోర్ అంచనాలకు తగినట్లు సాగలేదు. ఒక్కోసారి చాలా లౌడ్ గా అనిపిస్తుంది. ఇక పాటలు కూడా వీక్ గా అనిపిస్తాయి. తమ్మిరాజు ఎడిటింగ్ కూడా యావరేజ్ అనే చెప్పాలి. చాలా సీన్లు అనవసరం అనిపిస్తాయి. హరీష్, రామ్ ప్రసాద్ విజువల్స్ పర్వాలేదు. విజువల్ ఎఫెక్ట్స్ చీప్ గా అనిపిస్తాయి. షైన్ స్క్రీన్ సినిమాస్ నిర్మాణ విలువలు ఓ మోస్తరుగా ఉన్నాయి.
ప్లస్ పాయింట్స్:
- బాలకృష్ణ పవర్ఫుల్ పెర్ఫార్మన్స్
- మహిళా సాధికారిత కాన్సెప్ట్
మైనస్ పాయింట్స్:
- ఒక తీరుగా సాగని స్క్రీన్ ప్లే
- ఎంటర్టైన్మెంట్ లేకపోవడం
- ఫైట్స్
- సాంగ్స్, బ్యాక్ గ్రౌండ్ స్కోర్
- రన్ టైమ్
విశ్లేషణ:
మొత్తంగా చూసుకుంటే భగవంత్ కేసరి ఒక రొటీన్ మాస్ మూవీ. అటు బాలకృష్ణ అభిమానులను మెప్పించలేక, అటు రెగ్యులర్ ఆడియన్స్ కు నచ్చక మధ్యలోనే ఆగిపోయింది. అటు కథ బలంగా లేదు, ఎంటర్టైన్మెంట్ కూడా పూర్తిగా మెప్పించలేదు. బాలకృష్ణ వరకూ ఇంప్రెస్ చేసినా కానీ బలమైన స్టోరీ లేకపోవడం, రొటీన్ ట్రీట్మెంట్, కామెడీ లేకపోవడం, బోరింగ్ సీన్స్, ఫైట్స్, సాంగ్స్… ఇలా మైనస్ లతో భగవంత్ కేసరి ఒక బిలో యావరేజ్ మూవీగా మిగిలిపోతుంది.
తెలుగు బులెటిన్ రేటింగ్: 2/5