అప్పుడు జగన్‌, ఇప్పుడు చంద్రబాబు.. తేడా ఏముంది.?

రాజధానిగా అమరావతిని చంద్రబాబు ప్రకటించే సమయంలో నానా యాగీ జరిగింది. అప్పటి చంద్రబాబు సర్కార్‌పై అప్పటి ప్రతిపక్షం వైఎస్సార్‌ కాంగ్రెస్‌ పార్టీ చేసిన ఆరోపణలు అన్నీ ఇన్నీ కావు. రాజధాని పేరుతో చంద్రబాబు భూ దందాకి తెరలేపారంటూ వైఎస్సార్సీపీ నేతలు నానా రకాల ఆరోపణలూ చేశారు. అయితే, ‘వీళ్ళు రాజధాని నిర్మాణానికి వ్యతిరేకం.. ఇలాంటి ప్రతిపక్షం ప్రపంచంలో ఎక్కడా వుండదు.. అభివృద్ధి వ్యతిరేకులు.. రాష్ట్రానికి నష్టం చేస్తున్నారు..’ అంటూ అప్పట్లో చంద్రబాబు సర్కార్‌, ప్రతిపక్షం వైఎస్సార్సీపీపై ఎదురుదాడికి దిగింది.

చేసేది లేక, అసెంబ్లీ సాక్షిగా వైఎస్‌ జగన్‌, అమరావతికి మద్దతివ్వాల్సి వచ్చింది. పైకి మద్దతిచ్చినా, అమరావతికి వ్యతిరేకంగా వైఎస్‌ జగన్‌ పావులు కదుపుతూనే వచ్చారు. ఎవరో ఒకరితో కోర్టుల్లో కేసులు వేయిస్తూ, అమరావతికి ఆటంకాలు కల్పించారు కూడా. ఇప్పుడు అదే పని తెలుగుదేశం పార్టీ చేయబోతోంది. మూడు రాజధానులపై అసెంబ్లీ సాక్షిగా వైఎస్‌ జగన్‌ చూచాయిగా ప్రకటన చేశాక, రాష్ట్రంలో అలజడి బయల్దేరింది. రాయలసీమ ప్రాంత ప్రజలు, తమకే రాజధాని కావాలంటున్నారు. ఉత్తరాంధ్ర ప్రజలేమో, రాయలసీమ మీద గుస్సా అవుతున్నారు. రాజధాని అమరావతిలో గందరగోళం సరే సరి.

ఈ మూడు ప్రాంతాల ప్రజల ఆవేదనపై స్పందించని రాష్ట్ర ప్రభుత్వం, రాష్ట్ర అభివృద్ధికి చంద్రబాబు అడ్డుపడుతున్నారనీ, కేసులు వేసి మూడు రాజధానుల్ని అడ్డుకోవాలని చూస్తున్నారనీ ఎదురుదాడికి దిగుతోంది. ఉత్తరాంధ్ర అభివృద్ధి చంద్రబాబు ఇష్టం లేదని విజయసాయిరెడ్డి కొత్త వాదనను తెరపైకి తెచ్చారు.

రాజధానితోనే విశాఖ అభివృద్ధి చెందే అవకాశం వుంటే, వైఎస్‌ రాజశేఖర్‌రెడ్డి హయాంలోనే విశాఖతోపాటు కర్నూలు కూడా రాజధానులుగా ప్రకటితమయ్యేవి. అంటే, వైఎస్‌ జగన్‌ ‘విజన్‌’ వున్న నాయకుడు, వైఎస్సార్‌ ఆ మాత్రం అవగాహన లేని నాయకుడన్నమాట విజయసాయిరెడ్డి దృష్టిలో.

అమరావతి విషయమై ఇప్పటికే రైతులు ప్రభుత్వానికి వ్యతిరేకంగా న్యాయస్థానాల్ని ఆశ్రయించారు. ముందు ముందు మరిన్ని పిటిషన్లు దాఖలవుతాయి కూడా. ఆ పరిస్థితిని ముందే ఊహించి, చంద్రబాబు మీదకి విమర్శనాస్త్రం విజయసాయిరెడ్డి సంధించేశారన్నమాట.

‘విజయసాయిరెడ్డి చెప్పింది నిజం కాదు. ప్రభుత్వం ఇంకా మూడు రాజధానులపై నిర్ణయం తీసుకోలేదు..’ అని సాక్షాత్తూ మంత్రి పేర్ని నాని, క్యాబినెట్‌ భేటీ వివరాలు చెబుతూ విజయసాయిరెడ్డి గాలి తీసేశాక, చేతనైతే విజయసాయిరెడ్డి, పేర్ని నాని వ్యాఖ్యల్ని తప్పు పడుతూ వైఎస్‌ జగన్‌కి ఫిర్యాదు చేయాలి. కానీ, అంత సీన్‌ విజయసాయిరెడ్డికెక్కడిది.?