రాజధాని అవసరం లేని రాజకీయం.! ఆంధ్రప్రదేశ్‌కి ఇదే శాపం.!

అసలు ఆంధ్రప్రదేశ్ రాజధాని ఏది.. అన్న ప్రశ్నకు సమాధానం ముఖ్యమంత్రి వైఎస్ జగన్ మోహన్ రెడ్డికైనా తెలుసా.? అని జనం తరచి తరచి ప్రశ్నించుకునే పరిస్థితి వచ్చింది. నిజమేనా.? ఆంధ్రప్రదేశ్ ప్రజానీకం అలా అనుకుంటున్నారా.? అలా అనుకుంటే, ముఖ్యమంత్రిని ‘మన రాష్ట్ర రాజధాని ఏది.?’ అని ప్రజలెందుకు ప్రశ్నించడంలేదో ఏమో.!

దేశంలో ఏ రాష్ట్రానికీ ప్రస్తుతానికైతే రాజధాని పేరుతో సంక్షోభం లేదు. కానీ, ఆంధ్రప్రదేశ్ రాష్ట్రానికే ఆ పైత్యం దాపురించింది. మామూలుగా అయితే, ఆంధ్రప్రదేశ్ రాష్ట్రానికి రాజధాని అమరావతి. చంద్రబాబు హయాంలో విజయదశమినాడే అమరావతిని రాష్ట్ర రాజధానిగా ప్రజలకు ‘శంకుస్థాపన’ చేసి మరీ అందించడం జరిగింది.

చంద్రబాబు హయాంలో తప్ప.. చంద్రబాబు ఇచ్చిన కానుక ఏమీ కాదది. రాష్ట్ర ప్రభుత్వం తీసుకున్న నిర్ణయం, అప్పటికి చట్ట సభల్లో వున్న అన్ని రాజకీయ పార్టీలూ ఆ అమరావతిని సమర్థించిన వైనం.. ఇవన్నీ అందరికీ తెలిసిన విషయాలే.

‘రాష్ట్రానికి రాజధాని లేకపోయినా ఫర్లేదు.. తమ ఖాతాల్లో ముఖ్యమంత్రి బటన్ నొక్కి డబ్బులేస్తే చాలు..’ అనే స్థాయికి రాష్ట్ర ప్రజలు కూడా రాజధానిని లైట్ తీసుకున్నారేమో అనిపిస్తోంది.! నిజానికి, ఈ ప్రశ్న ఆంధ్రప్రదేశ్ ప్రజల్లోనే నడుస్తుండడం గమనార్హం.

‘ప్రస్తుతానికైతే మా రాజధాని అమరావతి. ముందు ముందు ఏం జరుగుతుందో మాకు తెలియదు..’ అని ఏమాత్రం మొహమాటం లేకుండా ఏపీ ప్రజలు, పొరుగు రాష్ట్రాలకు వెళుతున్నప్పుడు చెబుతున్నారు. ఇంతకీ, మంత్రులు ఏమని చెబుతున్నారట.? పేరుకే అమరావతి ఆంధ్రప్రదేశ్ రాష్ట్రానికి రాజధానిగానీ, అది స్మశానం తెలుసా.? అని చెబుతుండొచ్చు.. ఎడారిగా కూడా రాజధానిని అభివర్ణిస్తుండొచ్చు.. అన్న చర్చ సోషల్ మీడియాలో నడుస్తోంది.

విజయదశమి వస్తోంది.. వెళుతోంది.. ఇంకో విజయదశమి వస్తోంది.. రాజధాని సంక్షోభం నుంచి రాష్ట్రమైతే బయటపడటంలేదు. అంతలా ఏదో రాక్షస శక్తి.. దైవ శక్తిని మించి రాష్ట్రాన్ని ఆవహించేసింది మరి.!