రాజకీయ చిత్రం: ఇక్కడ మాత్రం కరోనా లేదాయె.!

‘స్థానిక ఎన్నికల్ని ప్రస్తుత పరిస్థితుల్లో నిర్వహించడం కుదరదు.. ఎందుకంటే, రాష్ట్రంలో కరోనా తీవ్రత ఇంకా తగ్గలేదు. పైగా, కరోనా సెకెండ్‌ వేవ్‌ వచ్చే అవకాశం వుంటుంది. ప్రజల ప్రాణాల్ని పణంగా పెట్టి, ఎన్నికలు నిర్వహించాలనుకోవడం హేయం..’ అంటోంది ఆంధ్రప్రదేశ్‌ ప్రభుత్వం. కానీ, స్కూళ్ళకు మాత్రం విద్యార్థుల్ని పంపాల్సిందేనని తెగేసి చెబుతోంది.

తాజాగా నేటి నుంచి ఎనిమిదో తరగతి విద్యార్థులకు స్కూళ్ళు తెరిచారు. స్థానిక ఎన్నికలకు ఇబ్బందికరంగా మారిన కరోనా వైరస్‌, స్కూళ్ళు తెరవడానికి ఎందుకు అడ్డంకి కాదు.? అన్నదే ఎవరికీ అర్థం కావడంలేదు. నిజానికి, ఇటీవల తొమ్మిదో తరగతి విద్యార్థుల కోసం స్కూళ్ళు తెరిస్తే, పెద్దయెత్తున విద్యార్థులు, స్కూల్‌ టీచర్లు కరోనా బారిన పడ్డారు. ఈ విషయమై ప్రభుత్వ గణాంకాలే స్పష్టంగా వున్నాయి. అనధికారిక లెక్కలు ఇంకెలా వుంటాయో అర్థం చేసుకోవచ్చు. ప్రభుత్వం కరోనా విషయంలో రెండు నాల్కల ధోరణి ప్రదర్శిస్తోందనడానికి ఇంతకన్నా నిదర్శనం ఇంకేం కావాలి.?

తుంగభద్ర పుష్కరాల కోసం భారీ ఏర్పాట్లు చేసింది వైఎస్‌ జగన్‌ ప్రభుత్వం. కానీ, పుష్కర స్నానం చేయడానికి వీల్లేదంటోంది. దాంతో, పుష్కరాలకు వెళ్ళాలనుకున్న భక్తులు, ఆంధ్రప్రదేశ్‌ని కాదని, తెలంగాణలోని తుంగభద్ర ఘాట్లను ఎంచుకుంటున్నారు. మద్యం పాలసీ విషయంలో కూడా తెలంగాణకు మేలు కలిగేలా వ్యవహరించింది గతంలో వైఎస్‌ జగన్‌ సర్కార్‌. ఇప్పుడు తుంగభద్ర పుష్కరాల విషయంలోనూ అదే జరుగుతోంది.

కరోనా చుట్టూ వైఎస్‌ జగన్‌ ప్రభుత్వం తమకు ఎలా కావాలంటే అలా ప్లేటు ఫిరాయించేస్తుండడం అందర్నీ విస్మయానికి గురిచేస్తోంది. తెలంగాణలో అయితే, ఇలాంటి విషయాల్లో గందరగోళమే లేదు. ఇక్కడ రాజకీయాలు సాగుతున్నాయి.. కానీ, ఏపీ తరహా గందరగోళం రాజకీయాలైతే తెలంగాణలో లేవని నిస్సందేహంగా చెప్పొచ్చు. గ్రేటర్‌ హైద్రాబాద్‌ ఎన్నికలు జరుగుతున్నాయి తెలంగాణలో.. కానీ, స్కూళ్ళ విషయంలో తెలంగాణ సర్కార్‌ అత్యంత బాధ్యతాయుతంగా వ్యవహరిస్తోంది.