ఆంధ్రప్రదేశ్‌ రాజకీయాల్లో ‘కులం కంపు’కి కారణమెవరు.?

దేశమంతా ఆంధ్రప్రదేశ్‌ రాజకీయాల్ని చూసి అసహ్యించుకుంటోందంటే దానిక్కారణం.. ఆంధ్రప్రదేశ్‌లో గత కొన్నేళ్ళుగా రాజ్యమేలుతున్న ‘కులం కంపు’ అని నిస్సందేహంగా చెప్పొచ్చు. టీడీపీ హయాంలో ‘కులం’ పేరుతో రాజకీయాలు జరిగాయి.. ఇప్పుడు వైఎస్‌ జగన్‌ హయాంలో ఆ ‘కులం’ పేరుతో రాజకీయాలు ఇంకా పెరిగిపోయాయి.

చంద్రబాబు ప్రభుత్వంపై అప్పటి ప్రతిపక్షం వైఎస్సార్సీపీ ‘కమ్మ’ ముద్ర వేస్తే, ఇప్పుడు వైసీపీ ప్రభుత్వంపై టీడీపీ ‘రెడ్డి’ ముద్ర వేసింది. నవ్విపోదురుగాక మనకేటి.? అన్నట్టు అప్పట్లో చంద్రబాబు ‘కమ్మ’ రాజకీయాలే చేశారు తాను ముఖ్యమంత్రిగా వున్నప్పుడు. ఇప్పుడు వైఎస్‌ జగన్‌ హయాంలోనూ ‘రెడ్డి’ రాజకీయాలే నడుస్తున్నాయి. ఇందులో ఇంకో మాటకు తావు లేదు.

ఇక, తాజాగా డాక్టర్‌ సుధాకర్‌ తప్ప తాగి నడి రోడ్డు మీద నానా యాగీ చేస్తే ‘దళిత రాజకీయం’ తెరపైకొచ్చింది. అసలు అలా ఆయన మారడానికి కారణం వైసీపీ ప్రభుత్వమేనన్నది టీడీపీ ఆరోపణ. ‘దళితుడితో నాటకమాడిస్తున్నారు’ అంటూ నిస్సిగ్గుగా వైసీపీ నేతలు విమర్శిస్తున్నారు. మానసిక స్థితి బాగాలేదంటారు.. టీడీపీ డైరెక్షన్‌లో పనిచేస్తున్నాడంటారు.. అధికార పార్టీ దగ్గర అస్సలేమాత్రం స్పష్టత లేదు డాక్టర్‌ సుధాకర్‌ని విమర్శించే క్రమంలో.

మొన్నటికి మొన్న నిమ్మగడ్డ రమేష్‌కుమార్‌ విషయంలో ఏం జరిగిందో చూశాం. ఆయన రాష్ట్ర ఎన్నికల కమిషనర్‌గా వున్నప్పుడే ఆయన మీద ‘కులం’ ముద్ర వేసింది అధికార పార్టీ. సాక్షాత్తూ ముఖ్యమంత్రి వైఎస్‌ జగన్‌, ‘కులం’ పేరుతో నిమ్మగడ్డ రమేష్‌కుమార్‌పై ఆరోపణలు చేసిన విషయాన్ని ఎలా మర్చిపోగలం.? టీడీపీని ఇంటికి పంపించి వైసీపీని అధికారంలోకి ప్రజలు తీసుకొచ్చింది.. చంద్రబాబు తరహాలోనే కుల రాజకీయాలు చేస్తారని కాదు కదా.! ఈ ప్రశ్న రాష్ట్ర ప్రజల నుంచి దూసుకొస్తోంది అధికార పార్టీ మీద.

నిమ్మగడ్డ రమేష్‌ కుమార్‌ తప్పు చేస్తే చర్యలు తీసుకోవచ్చు, కానీ కులం పేరు ఆపాదించడమేంటి.? డాక్టర్‌ సుధాకర్‌ విషయంలో అయినా అంతే.. మరొకరైనా అంతే. అసలు విషయం పక్కన పడేసి, నిస్సిగ్గుగా కుల రాజకీయాలు చేయడం ఇటు టీడీపీకి తగదు, అటు వైసీపీకి అసలే మంచిది కాదు. చాలా విషయాల్లో చంద్రబాబుకీ వైఎస్‌ జగన్‌కీ స్పష్టమైన పోలికలున్నాయి. రాష్ట్ర ప్రజానీకానికి ఈ విషయమై పూర్తిస్థాయి స్పష్టత వుంది. కుల రాజకీయాల విషయంలో వైసీపీ, టీడీపీ దొందూ దొందే.!