భీమ్లానాయక్: ఆంధ్రప్రదేశ్‌లో స్పెషల్ ‘కోత’.!

తెలంగాణ రాష్ట్రంలో ‘భీమ్లానాయక్’ సినిమాకి రెండు వారాలపాటు అదనంగా ఇంకో షో (అంటే, మొత్తంగా రోజుకి నాలుగు ఆటలు అన్నమాట..) వేసుకునేందుకు అనుమతి లభించింది. టిక్కెట్ల ధరల్ని పెంచుతూ కొన్నాళ్ళ క్రితమే తెలంగాణ ప్రభుత్వం ఉత్తర్వులు జారీ చేసిందనుకోండి.. అది వేరే సంగతి.

ఆంధ్రప్రదేశ్ రాష్ట్రంలో మాత్రం, సామాన్యుడికి అందుబాటులో సినిమా టిక్కెట్ల ధరలు.. అంటూ ‘కుంటి సాకు’ చూపుతూ, పవన్ కళ్యాణ్ సినిమాపై కక్ష సాధింపు చర్యలు షురూ అయ్యాయి. చాలా థియేటర్ల వద్ద ఐదు రూపాయలు, పది రూపాయలను టిక్కెట్ల ధరలుగా పేర్కొంటూ బోర్డులు వెలుస్తున్నాయి.

అదనపు షోలు వెయ్యడానికి వీల్లేదనీ, టిక్కెట్ల ధరలు రాష్ట్ర ప్రభుత్వం గతంలో విడుదల చేసిన జీవోకి అనుగుణంగానే వుండాలనీ అధికారుల నుంచి థియేటర్ల యాజమాన్యాలకు ‘బెదిరింపులు’ వెళుతున్నాయంటూ సోషల్ మీడియా వేదికగా ప్రచారం జరుగుతోంది.

ఇవన్నీ ఓ యెత్తు, ‘భీమ్లానాయక్’ సినిమాకి తొలి రోజే డిజాస్టర్ టాక్ తీసుకొచ్చేందుకు వైసీపీ శ్రేణులు సర్వసన్నద్ధమవుతున్నాయి. ఇందుకోసం సోషల్ మీడియాలో ట్విట్టర్, ఫేస్‌బుక్ వంటి వాటిని వినియోగించుకునే దిశగా బులుగు కార్యకర్తలకు స్పష్టమైన సంకేతాలు వెళ్ళిపోయాయట.

గతంలో.. అంటే, ‘శ్యామ్ సింగరాయ్’ కోసం ఎలాగైతే థియేటర్ల మీద దాడులు, సోదాలు నిర్వహించారో, ఇప్పుడూ అలాంటి పరిస్థితే వుండబోతోందంటూ వార్తా కథనాలు దర్శనమిస్తున్నాయి.
ఈ మొత్తం వ్యవహారం చూసి పవన్ కళ్యాణ్ అభిమానులు ఆగ్రహావేశాలతో రగిలిపోతున్నారు. ‘మనల్ని ఎవడ్రా ఆపేది..’ అంటూ వైఎస్సార్ కాంగ్రెస్ పార్టీకి సవాల్ విసురుతున్నారు. ఇంతకీ, ‘వకీల్ సాబ్’ సినిమాకి రివ్యూ ఇచ్చినట్లుగా, ఏపీకి చెందిన సోకాల్డ్ మంత్రులు ‘భీమ్లానాయక్’ సినిమాకీ రివ్యూలు ఇస్తారా.? వసూళ్ళ లెక్కల గురించి వెల్లడిస్తారా.? వేచి చూడాల్సిందే.