తెలంగాణలో రాజకీయం: షర్మిలకి అమరావతి తలనొప్పి.!

ఆంధ్రపదేశ్ రాష్ట్రంలో అన్న జగన్ మోహన్ రెడ్డి కోసం ‘జగనన్న వదిలిన బాణాన్ని నేను.. మన జగనన్ని అధికారంలోకి తీసుకురావాలి..’ అంటూ ఎన్నికల వేళ నినదించిన షర్మిల, ఇప్పుడు తనకు ఆంధ్రపదేశ్ అనే రాష్ట్రంతో అస్సలేమాత్రం సంబంధం లేదంటూ తెలంగాణకు పారిపోవడమేంటి.? అని అమరావతి మహిళా రైతులు ప్రశ్నిస్తున్నారు. ‘మీ అన్న తరఫున ఎన్నికల ప్రచారంలో పాల్గొన్నారు కదా.? ఒక్కరోజు దీక్షకే మీరు తెలంగాణ ముఖ్యమంత్రి మీద విరుచుకుపడుతున్నారు.. మీపై పోలీసులు దాడి చేశారంటున్నారు.. తెలంగాణ ప్రభుత్వం మీ ఉద్యమాన్ని అణచివేసిందంటున్నారు.

మరి, మా పరిస్థితి ఏంటి.? రక్తం చిందిస్తున్నాం మేము.. మమ్మల్ని మీ జగనన్న పంపిన పోలీసులు చితక్కొడుతున్నారు.. రక్తమొచ్చేలా బాదుతున్నారు.. మా ఇళ్ళల్లోకి చొరబడుతున్నారు.. మీ జగనన్న అయితే, మా మొహాలు కన్పించకుండా వుండేందుకు.. మా రోడ్ల మీద వెళుతూ పరదాలు అడ్డం కట్టుకుంటున్నారు..’ అంటూ అమరావతి మహిళా రైతులు వాపోతుండడం గమనార్హం. ‘విజయమ్మ, షర్మిలకు జన్మనిచ్చిన తల్లి అయితే కావొచ్చు. కానీ, ముందుగా ఆమె ఓ మహిళ. గతంలో ఎమ్మెల్యేగా పనిచేశారు.. వైసీపీ గౌరవాధ్యక్షురాలిగా వున్నారు.. అలాంటి విజయమ్మ, తెలంగాణలో తన కూతురికి అన్యాయం జరిగిపోయిందని గగ్గోలు పెట్టడం సబబే.. అదే సమయంలో, ఆంధ్రపదేశ్ రాష్ట్రంలో సాటి మహిళల పట్ల కనీస బాధ్యత ఆమె చూపించకపోతే ఎలా.?’ అని అమరావతి మహిళలు నిలదీస్తున్నారు.

మొత్తంగా చూస్తే, తెలంగాణలో పార్టీ పెట్టాలనుకుంటున్న షర్మిలకి, ఆంధ్రపదేశ్ నుంచి తలనొప్పి ఎదురవుతోంది. అమరావతి మహిళల ఆవేదనలోనూ నిజముంది. అమరావతి ఉద్యమం కోసం దాదాపు 500 రోజులుగా అక్కడి మహిళా రైతులు నానా అవస్థలూ పడుతున్నారు.. పోలీసుల చేతిలో దెబ్బలు తింటూనే వున్నారు. జగన్ కుటుంబంలోని మహిళకు ఒక నీతి, అమరావతి మహిళా రైతులకు ఇంకో నీతి అంటే ఎలా.? తెలంగాణలో నిరుద్యోగుల సమస్యలు కనిపిస్తాయి.. ఏపీలో నిరుద్యోగ సమస్యలు కనిపించవని షర్మిల అంటే ఎలా.?