అప్పుల కుప్ప ఆంధ్రపదేశ్.. అసలు రాష్ట్రానికి భవిష్యత్తు వుందా.?

‘చంద్రబాబు తన హయాంలో రాష్ట్రాన్ని అప్పుల కుప్పగా మార్చేశారు..’ అని గతంలో విమర్శించిన వైసీపీ, అంతకు మించి అప్పులు చేయడమే లక్ష్యంగా పెట్టుకుంది.. ఆ లక్ష్యాన్ని అధిగమించింది కూడా. ప్రతి నెలా కొత్త అప్పుల కోసం వెంపర్లాడటం తప్ప, రాష్ట్రంలో అభివృద్ధి అనేదేమైనా వుందా.? అన్న ప్రశ్నకు అధికార పార్టీ సమాధానం చెప్పలేని పరిస్థితుల్లో వుంది.

రాష్ట్ర ఆర్థిక మంత్రి బుగ్గన రాజేంద్రనాథ్, మొన్నీమధ్యన ఓ సందర్భంలో మాట్లాడుతూ, అప్పులు చేస్తున్నందుకు గర్వపడుతున్నాం.. అని సెలవిచ్చారు. సగటు మనిషి ఎవడూ అప్పులు చేస్తున్నందుకు గర్వపడడు.. భయపడతాడు. అదే రాష్ట్ర ప్రభుత్వం అప్పులు చేయాల్సి వస్తే ఎంతలా భయపడాలి.? భయం లేదు.. బాధ్యత అసలే లేదు. సంక్షేమ పథకాలు రాష్ట్రానికి గుది బండలా మారుతున్నాయి. అప్పులు చేయకపోతే ఉద్యోగులకు జీతాలు కూడా ఇవ్వలేని పరిస్థితి రావడమంటే, రాష్ట్రాన్ని ఎటువైపు పాలకులు నడిపిస్తున్నారో అర్థం చేసుకోవచ్చు.

‘చంద్రబాబు చేసిన తప్పుల్ని సరిదిద్దుతున్నాం..’ అని అధికార పార్టీ చెప్పడం చూస్తున్నాం. చంద్రబాబు అప్పలు చేయడాన్ని తప్పు పడుతూ, అంతకన్నా ఎక్కువ అప్పులు చేస్తున్న వైసీపీ, తప్పులు సరిదిద్దుతోందా.? కొత్త తప్పులు చేస్తోందా.? ఇలా అప్పులు చేసుకుంటూ పోతే, రాష్ట్రానికి అసలు భవిష్యత్తే వుండదని వైసీపీ రెబల్ ఎంపీ రఘురామకృష్ణరాజు చెబుతున్నారు. పలువురు ఆర్థిక వేత్తలు కూడా ఇదే అభిప్రాయాన్ని వ్యక్తం చేస్తున్నారు.

పొరుగు రాష్ట్రాలతో పోల్చితే, రాష్ట్రంలో మధ్యం ధరలు ఎక్కువ.. పెట్రోధరలూ ఎక్కువే.. మరి, తద్వారా వచ్చే ఆదాయం ఏమైపోతున్నట్టు.? ప్రభుత్వానికి బాధ్యత లేకపోతే, ప్రజల భవిష్యత్తు ప్రశ్నార్థకమైపోతుంది. ఎలా ఓటు బ్యాంకు రాజకీయాలు చేయాలి.? కొత్తగా సంక్షేమం మాటున.. ప్రజల్ని వంచించడానికి ఎలాంటి కొత్త పథకాలు ప్రకటించాలి.? అన్న ఆలోచన తప్ప, అప్పులు తగ్గించుకుని.. రాష్ట్ర ఆదాయం పెంచుకోవాలన్న ఆలోచన ప్రభుత్వానికి రాకపోవడం అత్యంత బాధాకరం.