తిరుపతి ఉప ఎన్నిక: ప్రజాస్వామ్యంపై దొంగ ఓటర్ల దాడి

ఇదెక్కడి చోద్యం.? బీజేపీకి చెందిన పోలింగ్ బూత్ ఏజెంట్ పేరుతోనే ఓ దొంగ ఓటరు ఓటేసేందుకు వచ్చాడంటే, తిరుపతి ఉప ఎన్నికలో ప్రజాస్వామ్యం ఎంత గొప్పగా వర్ధిల్లుతోందో అర్థం చేసుకోవచ్చు. ప్రత్యేక వాహనాల్లో దొంగ ఓటర్లను అధికార పార్టీ తరలిస్తోందని విపక్షాలు టీడీపీ, బీజేపీ, కాంగ్రెస్ ఆరోపిస్తున్నాయి. రాజకీయాల్లో ఇలాంటి ఆరోపణలు మామూలేనని కొట్టిపారేయడానికి వీల్లేదు. సాధారణంగా ఎన్నికలనగానే ముందుగా దొంగ ఓటర్ల వ్యవహారం తెరపైకొస్తుంటుంది. అయితే, అది చాల తక్కువ సంఖ్యలో వుంటుంది. కానీ, ఏకంగా 4 వేల బస్సుల్లో ఓటర్లను తరలించడమంటే ఆషామాషీ వ్యవహారం కాదు. ఇదేదో ఉత్తుత్తి ఆరోపణ కానే కాదు.

అందుకు తగ్గ ఆధారాల్ని విపక్షాలు మీడియా ముందుంచుతున్నాయి. సాధారణంగా ఎన్నికలు జరిగేటప్పుడు, ఆ నియోజకవర్గంలో కట్టుదిట్టమైన భద్రతా ఏర్పాట్లుంటాయి. తిరుపతి ఉప ఎన్నిక సందర్భంగా అవేవీ కన్పించడంలేదు. అనుమానాస్పదంగా పెద్దయెత్తున జనం గుమికూడి వుంటున్నా.. వారిని పోలీసులు అడ్డుకోవడంలేదు. ఎన్నికల వ్యవహారం అని కాదు, కరోనా నేపథ్యంలో అయినా జనాలు గుంపులుగా తిరగకుండా వారించాలి కదా.? అదీ జరగట్లేదు. పైగా, తన ఓటుని ఇంకో వ్యక్తి వేసేస్తున్నారంటూ పోలింగ్ బూత్ ఏజెంట్ ఒకరు వాపోతోంటే, ఆ ఏజెంటుని అక్కడి నుంచి బయటకు పంపేశారట పోలీసులు. ఇదీ తిరుపతిలో ప్రజాస్వామ్యంపై దొంగ ఓటర్లు చేస్తున్న దాడి, అందుకు పోలీసులు వత్తాసు పలుకుతున్న వైనం. దొంగ ఓటర్లు మీడియాకి అడ్డంగా చిక్కినా, వారంతా వైసీపీకి ఓటెయ్యడానికి వస్తున్నారని.. వాళ్ళే ఒప్పుకుంటున్నా, ‘తూచ్.. మాకేం సంబంధం లేదు.. ఇది విపక్షాల కుట్ర..’ అంటున్నారు మంత్రి పెద్దిరెడ్డి రామచంద్రారెడ్డి.

పంచాయితీ, మునిసిపల్ ఎన్నికల్లో ఇతర పార్టీల అభ్యర్థుల్ని ఓటర్లను బెదిరించి అధికార పార్టీ ఏకగ్రీవాలు చేసుకుని గెలవగలిగింది.. తిరుపతి ఉప ఎన్నిక కూడా అలాగే ఏకగ్రీవమైపోవాలని వైసీపీ కోరుకుని వుండొచ్చుగాక. ఆ పాచిక పారలేదన్న కారణంగానే, ఇప్పుడు దొంగ ఓటర్లను బరిలోకి దించిందని అనుకోవాలా.? లేదంటే, ఇదంతా విపక్షాల కుట్ర.. అని వైసీపీ చేస్తున్న ఆరోపణల్ని నిజమనుకోవాలా.? ఒక్కటి మాత్రం నిజం.. దేశ చరిత్రలోనే కనీ వినీ ఎరుగని స్థాయిలో దొంగ ఓటర్లు, ప్రజాస్వామ్యంపై తిరుపతి వేదికగా దాడి చేశారు.