‘పచ్చ’ పైత్యం: సినీ ప్రముఖులు యాచకులుగా మారిపోయారా.?

మరీ ఇంత దిగజారుడుతనమా.? ‘అవమానం జరిగింది ఆ నలుగురికి మాత్రమే కాదు, యావత్ సినీ పరిశ్రమకి..’ అంటూ టీడీపీ అనుకూల మీడియా, ముఖ్యమంత్రి వైఎస్ జగన్ మోహన్ రెడ్డితో సినీ ప్రముఖుల భేటీని అత్యంత హేయంగా విశ్లేషించింది. ప్రతిసారిలానే ‘పచ్చ పలుకు’ పచ్చ కామెర్ల చందంలోనే సాగింది. ఆత్మ స్తుతి, పర నింద తప్ప, అందులో ఏమీ లేదు.

చంద్రబాబు అయితే సినీ పరిశ్రమని ఇలా ఉద్ధరించేసేవారు.. జగన్ రెడ్డి గనుక సినీ ప్రముఖుల్ని అలా అవమనించారంటూ ఓ చెత్త విశ్లేషణని ‘ఆర్కే’ ఈ వారం బయటపెట్టిన వైనం అందర్నీ విస్మయానికి గురిచేస్తోంది. గతంలో జగన్ సర్కారుని సినీ పరిశ్రమ సమస్యలపై ‘రిపబ్లిక్’ సినిమా ప్రీ రిలీజ్ ఈవెంట్ సందర్భంగా పవన్ కళ్యాణ్ కడిగి పారేస్తే, అదేదో పెద్ద నేరంలా ఇదే ఆర్కే చెత్త విశ్లేషణ చేసిన విషయాన్ని ఎలా విస్మరించగలం.

చిరంజీవి సహా మహేష్, ప్రభాస్, రాజమౌళి, కొరటాల శివ తదితరులు సినీ పరిశ్రమ తరఫున ఏపీ సీఎం వైఎస్ జగన్ మోహన్ రెడ్డితో చర్చలు జరిపితే, యావత్ సినీ పరిశ్రమలో అందర్నీ ‘యాచకులుగా మార్చేశారు’ అనడం ఎంతవరకు సబబు.?

చిరంజీవి ఒరిగిపోయారో, ఒదిగిపోయారో అర్థం చేసుకోలేనంత అమాయకులైతే కారు జనం. మహేష్ అయినా, ప్రభాస్ అయినా, రాజమౌళి అయినా.. అత్యంత బాధ్యతాయుతంగా వ్యవహరించారు. పవన్ కళ్యాణ్ ప్రశ్నించిందీ సినీ పరిశ్రమ కోసమే. చిరంజీవి సహా మహేష్, ప్రభాస్ తదితరులు చర్చలు జరిపిందీ సినీ పరిశ్రమ కోసమే.

అందరూ ఒకేలా వుండరు కదా.? ఎవరి ధోరణి వారిది. అంతిమంగా సినీ పరిశ్రమకు మేలు జరగాలన్నదే అందరి ఉద్దేశ్యం అయినందుకు సంతోషించాల్సింది పోయి, ఒకర్ని ఒక సందర్భంలో విమర్శించి, ఆ వ్యక్తినే ఇంకో సందర్భంలో పొగుడుతూ, మిగతావాళ్ళని తప్పు పట్టడమంటే అంతకన్నా దిగజారుడతనం ఇంకోటుండదు.

చిరంజీవి, మహేష్, ప్రభాస్ తదితరులు పరిశ్రమలో వందలాది మంది, వేలాది మంది నటీనటులు, టెక్నీషియన్లు, నిర్మాతలు.. ఇలా అందరి కోసం వెళ్ళారు. సరే, వైఎస్ జగన్ మోహన్ రెడ్డి తీరు ఏంటి.? అన్నది వేరే చర్చ. కానీ, ‘యాచకులుగా మార్చేశారు’ అని చిరంజీవి బృందాన్ని విమర్శించడం దిగజారుడుతనానికే పరాకాష్ట.