ఆత్మ నిర్భర్‌ భారత్‌-3: రైతు బాగుపడేదెప్పుడు.?

కేంద్ర ఆర్థిక మంత్రి నిర్మలా సీతారామన్‌, ఆత్మ నిర్భర్‌ భారత్‌ అభియాన్‌ ప్యాకేజీకి సంబంధించి మూడో ఎపిసోడ్‌ని నేడు దేశ ప్రజల ముందుంచారు. ఇందులో రైతు సంక్షేమం గురించి కేంద్రం చాలా విషయాలు చెప్పింది. రైతు ఆదాయాన్ని పెంచుతామని చెప్పింది. రైతుకు భరోసా ఇస్తూ ఈ ప్యాకేజీలో అనేక అంశాల్ని ప్రస్తావించారు కేంద్ర ఆర్థిక మంత్రి నిర్మలా సీతారామన్‌. రైతులు ఎక్కడ తమ వ్యవసాయ ఉత్పత్తులకు డిమాండ్‌ వుంటే అక్కడ అమ్ముకునేలా కేంద్రం అవకాశం కల్పించడాన్ని అభినందించి తీరాలి.

లాక్‌ డౌన్‌ వ్యవధిలో కనీస మద్దతు ధరతో 74,300 కోట్ల రూపాయలకు పైగా కొనోగుళ్ళు చేయడం జరిగిందన్నారు కేంద్ర ఆర్థిక మంత్రి. ప్రధాన మంత్రి కిసాన్‌ ఫండ్‌ కింద 18,700 కోట్ల రూపాయలు బదిలీ చేశామన్నారు. పీఎం ఫసల్‌ బీమా యోజన కింద 6,400 కోట్లు చెల్లించినట్లూ చెప్పారు. పశు సంవర్ధక శాఖ కోసం అదనపు చర్యలు చేపట్టామన్నారు. 111 కోట్ల లీటర్ల పాలను అదనంగా సేకరించబడినట్లు వివరించారు. మత్స సంపద, రొయ్యల పరిశ్రమ విషయంలోనూ తమ ప్రభుత్వం అద్భుతంగా పనిచేసిందని చెబుతూ, ఆయా రంగాలకు ప్రత్యేక కేటాయింపుల్నీ ప్రస్తావించారు. తేనె టీగల పెంపకం, పశువులకు టీకాలు వేయించడం.. ఇలా చాలా అంశాలున్నాయి కేంద్ర మంత్రి వెల్లడించిన మూడో ప్యాకేజీలో.

నిజానికి, ఇలాంటి లెక్కలు బడ్జెట్‌ సమయంలోనే చూస్తుంటాం. ‘అది చేసేశాం.. ఇది చేసేయబోతున్నాం..’ అని ప్రభుత్వాలు చెప్పడం కొత్తేమీ కాదు. ఆరేళ్ళ క్రితమే ప్రధాని నరేంద్ర మోడీ, రైతు ఆదాయం తమ ప్రభుత్వ హయాంలో పెరగబోతోందని చెప్పారు. కానీ, ఏం జరిగింది.? రైతు ఆత్మ హత్యలు ఇంకా దేశంలో కొనసాగుతూనే వున్నాయి. రైతుకి గిట్టుబాటు ధర లభించడం లేదు. మరి, వినియోగదారులకైనా తక్కువ ధరకు బియ్యం, కూరగాయలు, పప్పు దినుసులు వంటివి లభిస్తున్నాయా.? అంటే అదీ లేదు. ఎందుకిలా.? ఈ ప్రశ్నకు మాత్రం ఏ ప్రభుత్వం దగ్గరా సమాధానం దొరకదు. మొత్తమ్మీద, మరోమారు కేంద్రం అంకెల గారడీ చేసినట్లే కన్పిస్తోంది. రైతుకి ఏ ప్రభుత్వాలు ఎంత ఎక్కువ చేసినా అభినందించి తీరాల్సిందే. కానీ, వేల కోట్లు.. లక్షల కోట్లు.. అంటే లెక్కలు చెప్పడం తప్ప.. రైతుకి కింది స్థాయిలో సాయం అందుతుందా.? రైతు బాగుపడుతున్నాడా.? అన్నది మాత్రం ఏ ప్రభుత్వమూ పట్టించుకోదు. మనది రైతు భారతం.. రైతు కన్నీరు పెడుతున్న భారతం.