డ్రగ్స్ అలా.. గంజాయి ఇలా.. ఎవరిది ఈ పాపం.?

పొరుగు రాష్ర్టాల నుంచి మధ్యం బాటిళ్లు అక్రమ మార్గాల్లో రాష్ట్రంలోకి ప్రవేశించకుండా, కట్టుదిట్టమైన చర్యలు చేపడుతోంది ఆంధ్ర ప్రదేశ్ ప్రభుత్వం. కానీ, తనిఖీల కళ్లు కప్పి పొరుగురాష్ట్రల నుంచి మధ్యం యధేచ్చగా రాష్ట్రంలోకి ప్రవహిస్తూనే ఉంది.

మీకిది.. నాకది.. అన్న చందాన ఆంధ్ర ప్రదేశ్ నుంచి ఇతర రాష్ట్రలకు పెద్ద ఎత్తున గంజాయి తరలి వెళుతోంది. వినడానికి జుగుప్సాకరంగా ఉన్నా.. ఇది నిష్టుర సత్యం. కేజీలకు కేజీలు గంజాయి ప్యాకెట్ల రూపంలో ఆంధ్ర ప్రదేశ్ నుంచి ఇతర రాష్ర్టాలకు అనధికారంగా ఎగుమతి అవుతోంటే, ప్రభుత్వం ఏం చేస్తోంది.?

ఆఫ్ఘనిస్థాన్ నుంచి నేరుగా ఆంధ్రప్రదేశ్ రాష్ట్రనికి డ్రగ్స్ స్మగ్లింగ్ జరుగుతోందనీ, దేశ వ్యాప్తంగా వివిధ ప్రాంతాలకు ఏపీ నుంచే డ్రగ్స్ వెళుతున్నాయనీ, రాజకీయ విమర్శలు రాగానే పోలీసు యంత్రాంగం గుస్సా అయ్యింది. ఆ రాతలు రాసిన మీడియా సంస్థల పైనా, ఆ ఆరోపణలు చేసిన రాజకీయ పార్టీలూ, నాయకుల పైనా చర్యలకు సిద్ధమైంది.

మరి, గంజాయి మాటేమిటి.? ప్రతిరోజూ గంజాయి ప్యాకెట్లు దొరుకుతున్నాయ్ ఏపీ, తెలంగాణ సరిహద్దుల్లో. ఏపీలోని ఏజెన్సీ ప్రాంతాల నుంచి, ప్రధానంగా విశాఖ, తూర్పుగోదావరి జిల్లాల ఏజెన్సీ ప్రాంతాల నుంచి పెద్ద మొత్తంలో గంజాయి రవాణా జరుగుతోంది. ఏపీ పోలీసులూ ఆ గంజాయి రవాణాని అడ్డుకుంటున్నారు.

అయినా, ఏపీ పోలీసుల కళ్లు కప్పి, తెలంగాణలోకి గంజాయి ఎలా వస్తోంది.? వేల ఎకరాల్లో గంజాయి సాగు జరుగుతోందని మీడియా సంస్థలు కోడై కూస్తున్నాయి. మరి, అక్కడే ఉక్కు పాదం మోపితే, మొక్కల రూపంలోని గంజాయి, ప్యాకెట్ల రూపంలోకి రాదు కదా.

గంజాయి వల్ల ప్రధానంగా నాశనమవుతోంది యువత. అందుకే ఉక్కుపాదం కాదు, అంతకు మించి బలమైన పాదంతో గంజాయి స్మగ్లింగ్ భూతాన్ని పాతాళానికి తొక్కేయాలి. రాజకీయ పార్టీలు చేసే రాజకీయ విమర్శలపై ఎదురుదాడికి దిగే ప్రభుత్వాలు, తమ వైఫల్యాల్ని గుర్తెరిగి.. బాధ్యతాయుతంగా వ్యవహరించాలి.. అవసరమైతే ఇలాంటి విషయాల్లో విపక్షాల నుంచి సూచనలు, సలహాల్ని తీసుకోవాలి కూడా.