‘ఎట్టి పరిస్థితుల్లోనూ వినోదం సరసమైన ధరకు ప్రేక్షకులకు అందజేసి తీరుతాం.. సినిమా టిక్కెట్లను ఆన్లైన్ విధానంలోనే విక్రయిస్తాం..’ అంటోంది ఆంధ్రప్రదేశ్ ప్రభుత్వం. దేశంలో ఎక్కడా లేని ఈ పైత్యం ఆంధ్రప్రదేశ్ రాష్ట్రంలోనే ఎందుకు.? ప్రభుత్వమే ఆన్లైన్ అమ్మకాల కోసం వెబ్ సైట్ ఏర్పాటు చేయడమేంటి.?
సరే, సినీ పరిశ్రమకు సంబంధించి అక్రమాలే జరుగుతున్నాయనుకుందాం.. పన్నులు ఎగ్గొడుతున్నారే అనుకుందాం.. టిక్కెట్ల ధరల్ని అడ్డగోలుగా పెంచేస్తున్నారే అనుకుందాం.. వాటిని పర్యవేక్షించడానికి వివిధ విభాగాలు వున్నాయ్ కదా.? అవి సరిగ్గా పని చేయడంలేదని ప్రభుత్వం చెప్పదలచుకుంటోందా.? ఏమోగానీ, సినిమా టిక్కెట్ల ధరల విషయమై రాష్ట్ర ప్రభుత్వం అనుసరిస్తున్న వైఖరి అందరినీ విస్మయానికి గురిచేస్తోంది.
సగటు సినీ ప్రేక్షకుడు సినిమాని ఉచితంగానే చూడాలని అనుకున్నా ఆశ్చర్యపోనక్కర్లేదు. ఎందుకంటే, సినిమా టిక్కెట్ అంతలా భారమైపోయింది వివిధ కారణాలతో. అసలు సినిమా టిక్కెట్లు బ్లాక్ మార్కెట్లోకి వెళ్లడానికి కారణమెవరు.? ఛోటా మోటా రాజకీయ నాయకులే కదా.? సినిమా టిక్కెట్ల దందాతో రాజకీయాల్లో రాణించిన మహానుభావులెందరో వున్నారు. వాళ్ళంతా ఈ వ్యవహారం చూసి సైలెంటుగా వున్నారంటే, కథ పెద్దదే వుండి వుండాలి.
సరే, ఆ సంగతి పక్కన పెడదాం.. నిత్యావసర వస్తువుల ధరలు ఆకాశాన్నంటుతున్నాయి.. కొన్ని నల్ల బజార్లకు తరలి వెళుతున్నాయ్. అంతెందుకు, కరోనా పాండమిక్ నేపథ్యంలో ప్రాణాధార మందుల ధరలు పది రెట్లు, వంద రెట్లు కూడా పెరిగిన పరిస్థితిని చూశాం. కల్తీ వ్యాక్సిన్లు కూడా సందడి చేశాయి. ఆక్సిజన్ సిలెండర్ల సంగతి సరే సరి. అలాంటి విషయాల్లో ప్రభుత్వం ‘ఆన్ లైన్’ అనే ఆలోచనే ఎందుకు చేయలేదు.?
అయితే, అక్కౌంట్లలో సంక్షేమ పథకాల పేరుతో డబ్బులేయడం.. లేదంటే, సినిమా టిక్కెట్లను ఆన్లైన్లో విక్రయిస్తామని చెప్పడం. మటన్ మార్టుల ఐడియాలు.. ఇంకేవేవో వింతలూ, విడ్డూరాలు. అంతే తప్ప, రోడ్లను బాగు చేద్దామన్న ఆలోచన వుండదు.. అసలు రాష్ట్రాన్ని అభివృద్ధి చేయాలన్న ఉద్దేశ్యమే వుండదు. అప్పు చేసి సంక్షేమ కూడు.. ఆపైన, తుగ్లక్ నిర్ణయాలు.. ఈ పాలన నభూతో నభవిష్యతి.. అనాలేమో.!
సినిమా టిక్కెట్ల వ్యవహారానికి సంబంధించి ఓ చర్చ జన బాహుళ్యంలో గట్టిగా నడుస్తోంది. ‘ఒకరి కష్టార్జిత సంపాదన మార్గంపై దెబ్బ కొట్టేందుకు.. కక్ష సాధింపు చర్యలు చేపట్టేందుకు.. ప్రత్యామ్నాయ శక్తి మనుగడ, అస్తిత్వం లేకుండా చేసేందుకు.. అనవసర అనాలోచిత అసందర్భ చర్యలతో ఒక పరిశ్రమ మొత్తాన్ని ఇబ్బందుల పాల్జేస్తున్న ప్రభుత్వం.. నైతికంగా ఎదుర్కోలేకా.? అధికారముంది కాబట్టి ఏమైనా చేసేందుకా.?’ అన్నదే ఆ చర్చ తాలూకు సారాంశం. అరచేతిని అడ్డుపెట్టి, సూర్యుడిని ఆపేయాలనుకుంటే అంతకన్నా హాస్యాస్పదం ఇంకోటుండదు.
231513 220490Some genuinely good stuff on this internet site , I enjoy it. 770220