టీటీడీ ‘పొలిటికల్’ మండలి ఎవరి కోసం.?

తిరుమల తిరుపతి దేవస్థానం పాలక మండలి.. ఎవర్ని పరిపాలించడానికి.? ఈ ప్రశ్న గత కొంతకాలంగా చర్చనీయాంశమవుతోంది. టీటీడీ అంటే ఒకప్పుడు వున్న గౌరవం వేరు. ఇప్పుడు టీటీడీ అంటే బోల్డంత వెటకారం. టీటీడీ తన గౌరవాన్ని పూర్తిగా కోల్పోయిందన్న విమర్శలు సర్వత్రా వ్యక్తమవుతున్నాయి. తప్పెవరిది.? ఇంకెవరిది తిరుమల తిరుపతి దేవస్థానం పాలక మండలి అంటే.. రాజకీయ నిరుద్యోగులకు పునరావాస కేంద్రంగా మార్చేశారు.

అసలు టీటీడీ పాలక మండలిలోకి పారిశ్రామిక వేత్తలు ఎందుకు.? రాజకీయ పార్టీలకు అండదండగా నిలిచేవారెందుకు.? అసలు రాజకీయ నాయకులు అందులో ఎందుకు వుండాలి.? టీటీడీ అంటే అదొక ధార్మిక పరిషత్తు కిందనే చూడాలి. వెంకటేశ్వరస్వామి సేవ కోసం, వెంకటేశ్వరస్వామి భక్తులకు మెరుగౌన సౌకర్యాల కోసం పాలక మండలి పని చేయాలి. కానీ, టీటీడీ సభ్యులుగా అవకాశమొస్తే.. టీటీడీ ఛైర్మన్‌గా అవకాశం దక్కించుకోగలిగితే.. ఏదో ఒక రూపంలో (ప్రత్యేక ఆహ్వానితులుగా) అవకాశం దక్కించుకుంటే.. ఇక, వెంకన్న దర్శనానికి సంబంధించి ప్రోటోకాల్ గౌరవాలు పొందచ్చనో, తమ సన్నిహితులకు వెంకన్న దర్శనాల్ని సులభంగా కల్పించేందుకోసమనో.. పైరవీలు చేసుకోవడం కోసమనో.. అన్నట్టు తయారయ్యాయి ఆ పదవులు.

ప్రత్యేక ఆహ్వానితులుగా 50 మంది నియామకం.. గతంలో ఎన్నడూ లేని కొత్త చరిత్ర. గతంలో 18 మందిగా వున్న టీటీడీ బోర్డు సభ్యుల సంఖ్య, వైఎస్సార్సీపీ అధికారంలోకి వచ్చాక రికార్డు స్థాయిలో పెరిగింది. ఇవన్నీ దేనికి సంకేతాలు.? కరోనా నేపథ్యంలో వెంకన్నను దర్శించుకునే భక్తుల సంఖ్య తగ్గింది. చిత్రంగా, టీటీడీ పాలక మండలి మాత్రం ‘జంబో’ అన్నట్టు తయారైంది.

మంత్రి పదవులు దక్కనివారికి టీటీడీలో అవకాశం కల్పించడం ద్వారా పార్టీలో అసమ్మతిని తగ్గించుకోవడం.. అనే గొప్ప రాజకీయ సూత్రాన్ని వైసీపీ ప్రభుత్వం అమలు చేసిందని అనుకోవాలేమో. పొరుగు రాష్ట్రాల పెత్తనం కూడా ఈసారి టీటీడీలో బాగా పెరిగిపోయిందన్న విమర్శలున్నాయి. అవన్నీ వైసీపీ రాజకీయ అవసరాల మేరకు జరిగిన నియామకాలేనా.? జస్ట్ ఆస్కింగ్.!