బ్రేకింగ్: సీఎల్పీ విలీనానికి రంగం సిద్ధం

తెలంగాణలో కాంగ్రెస్ శాసనసభా పక్షం అధికార టీఆర్ఎస్ లో విలీనం కావడానికి రంగం సిద్ధమైంది. ఇందుకు సంబంధించి గురువారం కీలక పరిణామాలు చోటుచేసుకున్నాయి. కాంగ్రెస్ పార్టీకి చెందిన 12 మంది ఎమ్మెల్యేలు తమను టీఆర్ఎస్ లో విలీనం చేయాలని కోరుతూ స్పీకర్ కు లేఖ అందజేశారు.

ఇప్పటివరకు 11 మంది కాంగ్రెస్ ఎమ్మెల్యేలు టీఆర్ఎస్ లో చేరగా.. గురువారం తాండూరు ఎమ్మెల్యే పైలట్ రోహిత్ రెడ్డి గులాబీ తీర్థం పుచ్చుకున్నారు. వీరందరూ కలిసి తొలుత ప్రగతి భవన్ లో టీఆర్ఎస్ వర్కింగ్ ప్రెసిడెంట్ కేటీఆర్ తో సమావేశమయ్యారు. అనంతరం అక్కడ నుంచి నేరుగా మినిస్టర్స్ క్వార్టర్స్ లోని స్పీకర్ పోచారం శ్రీనివాసరెడ్డి నివాసానికి వెళ్లారు. తామంతా సీఎం కేసీఆర్ నేతృత్వంలో పనిచేయడానికి సిద్ధంగా ఉన్నామని, తమను టీఆర్ఎస్ లో విలీనం చేయాలని కోరూత వినతిపత్రం అందజేశారు. దీనిపై వారంతా సంతకాలు చేశారు.

స్పీకర్ ను కలిసిన వారిలో సబితా ఇంద్రారెడ్డి(మహేశ్వరం), జాజుల సురేందర్ రెడ్డి (ఎల్లారెడ్డి), రేగ కాంతారావు (పినపాక), కందాల ఉపేందర్ రెడ్డి (పాలేరు), హరిప్రియా నాయక్ (ఇల్లందు), గండ్ర వెంకటరమణారెడ్డి (భూపాలపల్లి), వనమా వెంకటేశ్వరరావు (కొత్తగూడెం), చిరుమర్తి లింగయ్య (నకిరేకల్), దేవిరెడ్డి సుధీర్ రెడ్డి (ఎల్బీ నగర్), ఆత్రం సక్కు (ఆసిఫాబాద్), హర్షవర్థన్ రెడ్డి (కొల్లాపూర్), పైలట్ రోహిత్ రెడ్డి (తాండూరు) ఉన్నారు. తమ లేఖపై వెంటనే నిర్ణయం తీసుకోవాలని వారు స్పీకర్ ను కోరారు.

కాగా, ఈ పరిణామాలపై టీపీసీసీ ఆగ్రహం వ్యక్తంచేసింది. సీఎం కేసీఆర్ ప్రజాస్వామ్యానికి తూట్లు పొడుస్తున్నారని మండిపడింది. ఈ చర్యలకు నిరసనగా టీపీసీసీ వర్కింగ్ ప్రెసిడెంట్ భట్టి విక్రమార్క, ఎమ్మెల్యే శ్రీధర్ బాబు అసెంబ్లీ లోని గాంధీ విగ్రహం గేటు వద్ద దీక్షకు దిగారు. మూతికి నల్లగుడ్డ కట్టుకుని నిరసన తెలుపుతూ అక్కడే కూర్చున్నారు.