ఆరవీడులో ఆరని చిచ్చు..

అనంతపురం జిల్లా యల్లనూరు మండలంలోని ఆరవీడులో ప్రతీకారం బుసలు కొట్టింది. జంట హత్యల నేపథ్యంలో మృతుల బంధువులు విధ్వంసం సృష్టించారు. నిందితులకు చెందిన ఇళ్లు, తోటలు తగలబెట్టారు. పోలీసులు కాపలా ఉన్నప్పటికీ, ఈ దమనకాండను నిరోధించలేకపోయారు. ఈనెల 19న గ్రామానికి చెందిన మామా అల్లుళ్లు రాజగోపాల్, నారాయణప్పలను ప్రత్యర్థులు హత్యచేశారు. దీంతో అక్కడ ఎలాంటి ఉద్రిక్తతలు తలెత్తకుండా పోలీసులు బందోబస్తు ఏర్పాటు చేశారు. అయితే, మృతుల బంధువులు శనివారం అర్ధరాత్రి నిందితుల ఇళ్లు, తోటలను లక్ష్యంగా చేసుకుని విరుచుకుపడ్డారు. పచ్చని చీనీ చెట్లు, అరటి చెట్లను నరికేశారు. ఎక్కడికక్కడ నిప్పు పెట్టారు. ఈ క్రమంలో నిందితులకు చెందిన 9 మంది ఇళ్లలో నాలుగు కాలిపోయాయి. మరో రెండు ఇళ్లలో ఫర్నిచర్ ధ్వంసం కాగా, మూడు ఇళ్ల పైకప్పు భాగం కూలిపోయింది. అయితే, పోలీసులు మాత్రం జరిగిన సంఘటనను చిన్నదిగా చూపించేందుకు ప్రయత్నిస్తున్నారనే ఆరోపణలు వినిపిస్తున్నాయి. ఒక ఇళ్లు మాత్రమే కాలిందని, పోలీసులు సమయస్ఫూర్తితో వ్యవహరించి పరిస్థితిని అదుపులోకి తెచ్చారని డీఎస్పీ చెబుతున్నారు. అయితే, అక్కడ ఏం జరిగిందో తెలుసుకునేందుకు వెళ్లాలని భావించిన మీడియాను అనుమతించలేదు. రెండు వర్గాలూ అధికార వైసీపీకి చెందినవారే కావడంతో ఘటనను బయటకు రాకుండా చూస్తున్నారనే విమర్శలు వినిపిస్తున్నాయి.