కుటుంబం కరోనాకు బలి.. ఒంటరిగా 13 ఏళ్ల బాలుడు

కరోనా మహమ్మారి ఎన్ని కుటుంబాల్లో తీరని విషాదం నింపిందో లెక్కే లేదు. తల్లిదండ్రులకు పిల్లలను, పిల్లలకు తల్లిదండ్రులను దూరం చేసింది. తూర్పుగోదావరి జిల్లా రాజానగరంలో ఓ కుటుంబం మొత్తాన్ని కరోనా కబళించడంతో 13 ఏళ్ల బాలుడు ఒంటరిగా మిగిలాడు. తల్లిదండ్రులతోపాటు అమ్మమ్మ, తాతయ్య, నాన్నమ్మ కూడా దూరం కావడంతో అనాథగా మారాడు. రాజానగరం బ్రిడ్జి కౌంటీలో మేడిచర్ల సుధీర్ రాయల్, శ్వేత హరిత నివాసిస్తున్నారు. వీరి ఏకైక కుమారుడు సత్య సహర్ష రాజమహేంద్రవరంలోని ఓ ప్రైవేటు స్కూలులో ఏడో తరగతి చదువుతున్నాడు. ఈ క్రమంలో కరోనా ధాటికి వీరి కుటుంబం కకావికలమైంది. తొలుత బాలుడి నానమ్మ కరోనాతో మరణించగా.. అనంతరం ఏప్రిల్ 24న తండ్రి సుధీర్, మే 9న తల్లి శ్వేత కన్నుమూశారు. మరోవైపు రాజోలులోని శివకోడులో ఉంటున్న అమ్మమ్మ, తాతయ్య కూడా కరోనా బారిన పడి ప్రాణాలు కోల్పోయారు. రోజుల వ్యవధిలోనే ఐదుగురిని కోల్పోయి ఒంటరిగా మిగిలాడు. ప్రస్తుతం ఆ పిల్లాడికి మేనమామ ఒక్కరే ఉన్నారు. తన కుటుంబంలో ఇంతటి విషాదం జరిగిందనే సంగతి పూర్తిగా సత్య సహర్షకి తెలియదు. కాగా, ఈ విషయం తెలిసి ఎంపీ భరత్ రామ్ ఆ బాలుడిని పరామర్శించారు. ప్రభుత్వం నుంచి రావాల్సిన సాయాన్ని అతడికి అందజేస్తానని హామీ ఇచ్చారు.