వ్యాక్సిన్ డోసులు వేరైనా పర్లేదా?

కరోనా వ్యాక్సిన్ విషయంలో రోజూ ఏదో ఒక చర్చ జరుగుతూనే ఉంది. ప్రస్తుతం అందుబాటులో ఉన్న వ్యాక్సిన్లు రెండు డోసులు ఇస్తున్నారు. అయితే, మొదటి డోసు ఒక కంపెనీది, రెండో డోసు మరో కంపెనీది ఇవ్వొచ్చా అనే అంశంపై పూర్తిగా స్పష్టత రావడంలేదు. వేర్వేరు డోసులు ఇచ్చినా సమస్య లేదని కొందరు అంటుండగా.. ఇందుకు మరిన్ని పరిశోధనలు జరగాల్సి ఉందని మరికొందరు పేర్కొంటున్నారు. ప్రస్తుతం ఉన్న టీకాలన్నీ వైరస్ తో పోరాడే యాంటీబాడీలను ఉత్పత్తి చేసేవే కాబట్టి, వేర్వేరు డోసులు ఇచ్చినా అవి ఒకేలా పనిచేస్తాయని డబ్ల్యూహెచ్ ఓ టీకా విభాగం డైరెక్టర్ కేట్ ఒబ్రెయిన్ అభిప్రాయపడ్డారు. బ్రిటన్ తోపాటు ఫ్రాన్స్, జర్మనీల్లో కూడా దీనిపై పరిశోధనలు సాగుతున్నాయి. తొలుత ఆస్ట్రాజెనెకా, తర్వాత ఫైజర్ వ్యాక్సిన్ పొందినవారికి ఎలాంటి సమస్యలూ ఉత్పన్నం కాలేదని తేలింది. అయితే, కొందరిలో నొప్పులు, చలి వంటి చిన్నచిన్న సమస్యలు వచ్చాయని వెల్లడైంది. మొదట ఒక డోసు, తర్వాత మరో కంపెనీ డోసు ఇవ్వడానికి కొన్ని దేశాలు అనుమతించాయి. భారత్ లో మాత్రం దీనిపై ఇంకా అనుమతి రాలేదు. సాధ్యమైనంత వరకు ఒకే కంపెనీ డోసులు ఇవ్వడం మంచిదని కేంద్ర ప్రభుత్వం భావిస్తోంది.