రాజుగారి ‘రక్త’ చరిత్ర.. ‘రక్తం’ తాగిన వైసీపీ నేతలెవరు.?

వైఎస్సార్సీపీ ఎంపీ రఘురామకృష్ణరాజు మరోమారు సంచలన వ్యాఖ్యలు చేశారు. ‘నా రక్తం తాగారు’ అంటూ సొంత పార్టీపై నిప్పులు చెరిగారు. ‘ఇంతకీ మీ రక్తం తాగిందెవరు.?’ అని మీడియా ప్రశ్నిస్తే, ‘పార్టీ తాగింది.. పార్టీ నేతలు తాగారు.. నా రక్తం నాకు తిరిగిచ్చేస్తే.. అప్పుడు రాజీనామా గురించి ఆలోచిస్తాను..’ అంటూ రఘురామ తనదైన స్టయిల్లో సమాధానమిచ్చారు. ఇంతకీ, ఇక్కడ ‘రక్తం’ అంటే నిజమైన రక్తమేనా.? లేదంటే, ‘ఎన్నికల కోసం చేసిన ఖర్చు’ అనుకోవాలా.? 2019 ఎన్నికల్లో వైఎస్సార్సీపీ అడ్డగోలుగా ఖర్చు చేసిందనే విమర్శలున్నాయి. ఓట్ల కోసం కరెన్సీ నోట్లను విచ్చలవిడిగా వైసీపీ నేతలు ఖర్చు చేశారంటూ ఇప్పటికీ రాజకీయ వర్గాల్లో చర్చ జరుగుతూనే వుంది.

ప్రధానంగా ఉభయ గోదావరి జిల్లాల్లో, అందునా నర్సాపురం నియోజకవర్గంలో కనీ వినీ ఎరుగని స్థాయిలో ‘ఎన్నికల ఖర్చు’ అనధికారికంగా జరిగిందన్నది చాలామంది వాదన. రఘురామరాజుని వైసీపీలోకి లాక్కొంచిందే, ఆ ‘ఖర్చు’ కోసం అనీ, అలా ఆయన సొమ్ములతో గెలిచిన వైసీపీ, ఇప్పుడాయన్ని ఇంతలా వేధిస్తుండడాన్ని జీర్ణించుకోలేకనే.. రఘురామకృష్ణరాజు గుస్సా అవుతున్నారనీ రాజకీయ వర్గాల్లో చర్చ జరుగుతోంది. మరోపక్క, గతంలో గోదావరి పుష్కరాల్లో మునిగిన వైఎస్‌ జగన్‌, ఆ మునక చిత్తశుద్ధితో చేసిందే అయితే, తిరుమల తిరుపతి శ్రీ వెంకటేశ్వరస్వామి దర్శనం కోసం వెళ్ళినప్పుడు డిక్లరేషన్‌పై సంతకం చేయాలని సవాల్‌ విసిరారు.‘సంతకం చేసే ధైర్యం లేదా.?’ అని నిలదీశారు.

కాగా, ‘నేను ఎక్కడికి వెళతానంటే అక్కడే చంపేస్తామని మా పార్టీ నేతలే హెచ్చరిస్తున్నారు. అలాంటి వారికి, తనకు సెక్యూరిటీ వుందనే విషయాన్ని మాత్రమే గుర్తు చేస్తున్నాను.. ఎవరికీ భయపడే ప్రసక్తే లేదు. రాష్ట్రమంతటా తిరుగుతాను..’ అంటూ తేల్చి చెప్పారు రఘురామకృష్ణరాజు. ‘నా బాగోతం బయటపెడతామని కొందరంటున్నారు.. ఈ క్రమంలో వాళ్ళ బాగోతాలే బయటపడ్తాయ్‌..’ అని ఎద్దేవా చేసిన రఘురామకృష్ణరాజు, న్యాయ వ్యవస్థపై వ్యూహాత్మక కుట్ర జరుగుతోందని, దీన్ని ప్రజాస్వామ్యవాదులంతా ఖండించాలని పిలుపునిచ్చారు. ‘కేవలం ఆంధ్రప్రదేశ్‌లో న్యాయ వ్యవస్థ కారణంగానే ప్రజలు హాయిగా జీవించగలుగుతున్నారు. అది ఇష్టం లేక, న్యాయవ్యవస్థపై మా పార్టీ నేతలు దాడికి దిగుతున్నారు..’ అని ఆరోపించారు రఘురామకృష్ణరాజు.