మంత్రి నాని హిందువే కాదు: పరిపూర్ణానంద ఫైర్

తిరుమల డిక్లరేషన్ వివాదం అంతకంతకూ ముదురుతోంది. తిరుమల శ్రీవారిని దర్శించుకునే అన్యమతస్తులు ఎవరైనా సరే డిక్లరేషన్ ఇవ్వాల్సిందేనని ప్రతిపక్షాలు పట్టుబడుతుండగా.. ముఖ్యమంత్రి హోదాలో ఉన్నవారు డిక్లరేషన్ ఇవ్వాల్సిన అవసరం లేదని అధికార వైసీపీ వాదిస్తోంది. ఈ నేపథ్యంలో అటు భజరంగ్ దళ్ కార్యకర్తలతోపాటు తెలుగుదేశం పార్టీ కార్యకర్తలు నిరసనలు, ఆందోళనలు చేపట్టారు. ఈ క్రమంలో స్వామి పరిపూర్ణానంద తీవ్రంగా స్పందించారు. తిరుమలపై మంత్రి కొడాలి నాని చేసిన విపరీత వ్యాఖ్యలను తప్పుబట్టారు. హిందూ ఆలయాల గురించి మాట్లాడేటప్పుడు ఒళ్లు దగ్గర పెట్టుకోవాలని హెచ్చరించారు.

తిరుమలపై గతంలో ఎవరూ ఇలాంటి వ్యాఖ్యలు చేయలేదన్నారు. ఏదైనా వివాదం తలెత్తితే దానిని పరిష్కరించాల్సిన బాధ్యత మంత్రులపై ఉంటుందని.. కానీ మంత్రి నాని చేసిన వ్యాఖ్యలు అగ్నికి ఆజ్యం పోసేలా ఉన్నాయని ధ్వజమెత్తారు. పవిత్ర తిరుమలపై విపరీత వ్యాఖ్యలు చేసిన నాని అసలు హిందువే కాడని పేర్కొన్నారు. ఒకవేళ నాని తిరుమల వచ్చినా ఆయన కూడా డిక్లరేషన్ ఇవ్వాల్సిందేనని తేల్చిచెప్పారు. ఆయన హిందూ కుటుంబం నుంచి వచ్చిన వ్యక్తి అయినా సరే.. దేవుళ్లపై విపరీత వ్యాఖ్యలు చేసినందున హిందువు కాడన్నారు.

తిరుపతి ఎవడబ్బ సొమ్మని అనడం దారుణమైన అంశమని.. తిరుమల డిక్లరేషన్ పై ప్రశ్నించడం అహంకారమే అవుతుందని పరిపూర్ణానంద స్పష్టంచేశారు. మంత్రి భ్రమల్లో నుంచి బయటకు రావాలన్నారు. తిరుమల కొండతో పెట్టుకున్నవారి బూడిద కూడా దొరకలేదనే విషయం గుర్తుంచుకోవాలని హితవు పలికారు. చరిత్ర చూస్తే అవన్నీ తెలుస్తాయన్నారు. సీఎం జగన్ వెంటనే దీనిపై స్పందించకపోతే ఆయనే ఈ మాటలు మాట్లాడించారని అనుకోవాల్సి వస్తుందని పరిపూర్ణానంద వ్యాఖ్యానించారు.

వైసీపీకి మొన్న వచ్చిన 151 సీట్లలో 149 సీట్లు హిందువులు ఓట్లు వేస్తేనే వచ్చాయన్న సంగతి గుర్తుంచుకోవాలన్నారు. శ్రీకాకుళం నుంచి అనంతపురం వరకు హిందూ ఆలయాలపై దాడులు జరుగుతున్నాయని ఆవేదన వ్యక్తంచేశారు. వచ్చే ఎన్నికల్లో జగన్ ను ఓడించాలనే లక్ష్యంతో కొందరు ఈ దురాగతాలకు పాల్పడుతున్నారని.. ఇందులో మంత్రి నాని వంటి వాళ్లు భాగస్వాములయ్యారని స్వామి ఆరోపించారు. మరోవైపు డిక్లరేషర్ విషయంపై ఎమ్మెల్యే రోజా స్పందించారు.

సీఎం హోదాలో ఉన్నవారు డిక్లరేషన్ ఇవ్వాల్సిన అవసరం లేదన్నారు. గతంలో సోనియాగాంధీ తిరుమల వచ్చినప్పుడు డిక్లరేషన్ ఇచ్చారా అని ప్రశ్నించారు. అలాగే వైఎస్ కూడా డిక్లరేషన్ ఇవ్వలేదని పేర్కొన్నారు. జగన్ కనీసం 20 నుంచి 25 ఏళ్లపాటు సీఎం హోదాలో శ్రీవారికి పట్టువస్త్రాలు సమర్పిస్తారని, ఆయన డిక్లరేషన్ ఇవ్వాల్సిన అవసరం లేదని స్పష్టంచేశారు.