ప్రళయమేనట.. స్పీకర్‌ తమ్మినేని మాట్లాడాల్సిన మాటలేనా ఇవి.?

‘జగన్‌ మౌనం బద్ధలైతే ప్రళయమే..’ అని అంటున్నారు ఆంధ్రప్రదేశ్‌ అసెంబ్లీ స్పీకర్‌ తమ్మినేని సీతారాం. ఏ ఉద్దేశ్యంతో ఆయన ఈ వ్యాఖ్యలు చేసినా, అత్యంత బాధ్యతారాహిత్యంతో కూడిన వ్యాఖ్యలుగానే వీటిని పరిగణించాల్సి వస్తుంది.

ఓ సాదా సీదా రాజకీయ నాయకుడు ఇలాంటి మాటలు అంటేనే, వాటిని సీరియస్‌గా తీసుకోవాల్సి వుంటుంది. అలాంటిది, స్పీకర్‌ పదవిలో వున్న తమ్మినేని సీతారాం, న్యాయ వ్యవస్థ విషయంలో ఇంతలా సంయమనం కోల్పోవడమా.? జగన్‌ మెప్పు కోసం మరీ ఇంతలా తన స్థాయిని తమ్మినేని సీతారాం దిగజార్చేసుకోవడం అందర్నీ విస్మయానికి గురిచేస్తోంది.

ప్రజాస్వామ్యంలో న్యాయ వ్యవస్థ అత్యంత కీలకమైనది. అధికారంలో వున్నోళ్ళు రాజ్యాంగానికి లోబడి చేసే చట్టాల్ని పరిరక్షించాల్సిన బాధ్యత న్యాయ వ్యవస్థ మీద వుంటుంది. సమాజంలో ఏ పౌరుడైనా న్యాయవ్యవస్థను ఆశ్రయిస్తే, న్యాయస్థానాలు ఆయా పిటిషన్లను స్వీకరించకుండా వుంటాయా.? చట్ట విరుద్ధమైన కార్యకలాపాలు జరుగుతున్నప్పుడు న్యాయ వ్యవస్థ చూస్తూ ఊరుకోవాలా.? ‘అధికారం మా చేతుల్లో వుంది.. మేం ఏమైనా చేస్తాం..’ అంటే, న్యాయ వ్యవస్థ ఎలా ఊరుకుంటుంది.? ఛాన్సే లేదు.

ఈ మాత్రం ఇంగితం కూడా లేకుండా అధికార పార్టీ నేతలు వ్యవహరించడమే కాదు, న్యాయ వ్యవస్థపైనే దాడికి దిగుతున్నారు. ఒక వ్యక్తి మౌనం బద్ధలైతే ప్రళయం వచ్చేస్తుందా.? వైఎస్‌ జగన్‌ మాత్రమే మొత్తం ప్రపంచాన్ని నడిపించేస్తున్నట్లుంది తమ్మినేని సీతారాం వ్యాఖ్యల్ని చూస్తోంటే. అధికారం శాశ్వతం కాదు.

గతంలో చంద్రబాబు విషయంలో ఇలాగే జరిగింది. చంద్రబాబు తనను తాను చాలా ఎక్కువగా ఊహించేసుకుని బోల్తాపడ్డారు. భవిష్యత్తులో వైఎస్‌ జగన్‌కి ఆ పరిస్థితి రాకూడదంటే, ముందుగా ఆయన ‘భజనపరుల’ నుంచి దూరంగా వుండాలి. ఇదే తమ్మినేని సీతారాం గతంలో వైఎస్‌ జగన్‌ని విమర్శించిన సందర్భాలున్నాయి. చంద్రబాబుని ఆకాశానికెత్తేసిన రోజులున్నాయి.

రాజకీయ నాయకుల మౌన బద్ధలైతే ప్రళయాలు వచ్చేస్తాయా.? ఇంతకన్నా హాస్యాస్పదం ఇంకేముంటుంది.? రాష్ట్రంలో హిందూ దేవాలయాలపై వరుస దాడులు జరుగుతున్నాయి.. వాటిపై స్పందించలేని తమ్మినేని సీతారాం, ప్రళయం గురించి మాట్లాడితే.. హాస్యాస్పదం కాక మరేమిటి.?