జస్ట్‌ ఆస్కింగ్‌: వైఎస్‌ జగన్‌ రాజధానిని తరలిస్తున్నారా.? లేదా.?

ఆంధ్రప్రదేశ్‌ రాజకీయాల్లో ‘రాజధాని’ వ్యవహారం సెగలు పుట్టిస్తోంది. ‘మూడు రాజధానుల ఏర్పాటు అంటే, దానర్థం.. ఇప్పటికే రాజధానిగా వున్న అమరావతిని మార్చడం కాదు.. కొత్తగా మరో రెండు రాజధానులను నిర్మించడం అని అర్థం..’ అని చెబుతోంది అధికార వైఎస్సార్సీపీ. వైసీపీ ఎమ్మెల్యేలు, మంత్రులు.. ఇదే విషయమై రకరకాల వివరణలు ఇస్తున్నారు.. విపక్షాలపై దుమ్మెత్తిపోస్తున్నారు. అయితే, ఇదంతా ‘ఆత్మవంచన’ తప్ప ఇంకోటి కాదని రాజకీయ విశ్లేషకులు అభిప్రాయపడుతున్నారు.

చంద్రబాబు హయాంలో అమరావతి, ఆంధ్రప్రదేశ్‌ రాజధాని అయ్యింది. అక్కడే జ్యుడీషియల్‌ రాజధాని.. అక్కడే అడ్మినిస్ట్రేటివ్‌ క్యాపిటల్‌.. అక్కడే లెజిస్లేచర్‌ క్యాపిటల్‌ ఏర్పాటు కావాల్సి వుంది. కానీ, వైఎస్‌ జగన్‌ ప్రభుత్వం అభివృద్ధి వికేంద్రీకరణ పేరుతో, మూడు రాజధానుల కాన్సెప్ట్‌ని తెరపైకి తెచ్చింది. అమరావతిలో వున్న ఎగ్జిక్యూటివ్‌ క్యాపిటల్‌ని విశాఖకు తరలిస్తారు. అమరావతిలోనే వున్న జ్యుడీషియల్‌ క్యాపిటల్‌ని కర్నూలుకి తరలిస్తారు. సో, ఇది ముమ్మాటికీ రాజధాని తరలింపు మాత్రమే అవుతుంది. ఇందులో ఇంకో మాటకు తావు లేదు.

మరి, వైసీపీ నేతలు ఎందుకు ఆత్మవంచనకు పాల్పడుతున్నారు.? ఇదేమీ మిలియన్‌ డాలర్ల ప్రశ్న కాదు. అధినేత మెప్పు పొందే క్రమంలో, ప్రజల్ని మభ్యపెట్టడం తప్ప.. రాజధాని విషయంలో వైసీపీ నేతలకు అస్సలేమాత్రం చిత్తశుద్ధి లేదన్నది స్పష్టమైపోయింది. సరే, వైసీపీ ప్రభుత్వం విధానపరమైన నిర్ణయం తీసుకుంది. ఆ పార్టీ నేతలు, ఆ విధానానికి కట్టుబడి వుండొచ్చుగాక. ఆ విషయాన్ని జనానికి స్పష్టం చేయాలి కదా.! మేం రాజధానిని తరలిస్తున్నాం.. అమరావతి నుంచి ఆయా విభాగాల్ని తీసుకుపోతున్నాం.. అమరావతి ఇకపై ఉత్త ‘డొల్ల’ మాత్రమే.. పేరుకు మాత్రమే ఇక్కడ శాసన రాజధాని వుంటుంది.. అని చెప్పే ధైర్యం ఆ పార్టీ నేతలకు లేకపోవడం శోచనీయమే.

ఏడాది గడిచింది.. అమరావతిలో కావొచ్చు.. రాష్ట్రంలో ఇతర ప్రాంతాల్లో కావొచ్చు.. ఒక్కటంటే ఒక్కటి చెప్పుకోదగ్గ పెద్ద ప్రాజెక్టు ఏదీ చేపట్టలేకపోయింది వైఎస్‌ జగన్‌ ప్రభుత్వం. అలాంటప్పుడు, మిగిలిన నాలుగేళ్ళలో మూడు రాజధానుల్ని ఎలా నిర్మించగలుగుతుంది.? కరోనా సంక్షోభం దెబ్బకి రాష్ట్ర ఆర్థిక వ్యవస్థ మరింత ఛిన్నాభిన్నమైపోయిందాయె. కేంద్రం నుంచి రాజధాని / రాజధానులకు సహకారం అందడం అన్నది జరిగే వ్యవహారమే కాదు. మరెలా మూడు రాజధానుల నిర్మాణం జరుగుతుంది.? ఐదేళ్ళకోసారి గద్దెనెక్కేవారు మారితే.. మారిన ప్రతిసారీ రాజధాని మారిపోవాల్సిందేనా.? ‘మాకు రాజదాని లేదు మొర్రో..’ అని రాష్ట్ర ప్రజలు ఇంకెన్నాళ్ళు వేదన అనుభవించాలి.?