బాబోరి సవాల్‌: 48 గంటల్లో జగన్‌ ప్రభుత్వాన్ని రద్దు చేస్తారా.?

తెలుగుదేశం పార్టీ అధినేత, ఆంధ్రప్రదేశ్‌ మాజీ ముఖ్యమంత్రి నారా చంద్రబాబునాయుడు, 48 గంటల్లో వైఎస్‌ జగన్‌ ప్రభుత్వాన్ని రద్దు చేయగలరా.? అంటూ సవాల్‌ విసిరారు. ‘ప్రభుత్వాన్ని రద్దు చేసి, ఎన్నికలకు వెళదాం.. మూడు రాజధానులపై ప్రజలు ఏమనుకుంటున్నారో తెలిసిపోతుంది..’ అంటూ చంద్రబాబు జూమ్ యాప్‌ ద్వారా నిర్వహించిన ప్రెస్‌మీట్‌లో సంచలన వ్యాఖ్యలు చేశారు. ‘ఎన్నికల ప్రచారంలో మూడు రాజధానుల గురించి మీరు మాట్లాడలేదు. అధికారంలోకి వచ్చాక ప్రజల్ని మోసగించి, అమరావతి నుంచి రాజధానిని తరలిస్తున్నారు. ఇది ప్రజలకు సంబంధించిన విషయం.. మీ వ్యక్తిగత విషయం కాదు. ప్రజలు మూడు రాజధానుల్ని ఆమోదిస్తున్నారా.? లేదా.? అన్నది ఎన్నికల్లోనే తెలుస్తుంది..’ అంటూ చంద్రబాబు వ్యాఖ్యానించారు.

ఇంతకీ, చంద్రబాబు సవాల్‌ని ముఖ్యమంత్రి వైఎస్‌ జగన్‌ స్వీకరిస్తారా.? లేదా.? ఏమోగానీ, 48 గంటల్లో ప్రభుత్వాన్ని రద్దు చేయాలని ఓ మాజీ ముఖ్యమంత్రి ప్రస్తుత ప్రభుత్వాన్ని డిమాండ్‌ చేయడం అస్సలేమాత్రం సబబు కాదన్నది నిర్వివాదాంశం. అమరావతి విషయంలో వైఎస్‌ జగన్‌ ప్రభుత్వం, రాష్ట్ర ప్రజల్ని వంచించిందన్నదాంట్లో ఎవరికీ ఎలాంటి సందేహాల్లేవు. ‘తడి గుడ్డతో గొంతు కోయడం’ అన్న చందాన, అమరావతికి అధికార వైఎస్సార్‌ కాంగ్రెస్‌ పార్టీ వెన్నుపోటు పొడిచింది. ‘అమరావతి ఎక్కడికీ పోదు.. అని రాష్ట్ర ప్రజల్ని మభ్యపెట్టిన నేతలే, ఇప్పుడు అమరావతిని స్మశానంతో పోల్చుతున్నారు. అమరావతిలో అవినీతి జరిగిందా.? లేదా.? అన్నది వేరే చర్చ. అవినీతి జరిగితే, దానికి కారకులైనవారిపై నిస్సందేహంగా చర్యలు తీసుకోవచ్చు. ఇక, అమరావతి విషయంలో చంద్రబాబు తన వైఫల్యాల్ని కప్పిపుచ్చుకునేందుకు ‘బస్తీ మే సవాల్‌’ అంటున్నారు.

హైద్రాబాద్‌ ఉమ్మడి రాజధాని.. అనే విషయాన్ని పరిగణనలోకి తీసుకుని, అమరావతిని ‘నోటిఫై’ చేయడంలో చంద్రబాబు తన హయాంలో ఒకింత అలసత్వం ప్రదర్శించిన మాట వాస్తవం. కేంద్రం ద్వారా అమరావతిని అధికారికంగా నోటిఫై చేయించి వుంటే.. ఇప్పుడీ పరిస్థితి వచ్చేదే కాదు. ఏదిఏమైనా, మరోమారు చంద్రబాబు తనదైన పొలిటికల్‌ డ్రామాకి తెరలేపారు. చిత్రమేంటంటే.. అమరావతికి వెన్నుపోటుపొడిచిన టీడీపీ, వైసీపీ.. ఇప్పుడు ఒకర్ని ఒకరు సవాల్‌ చేసుకుంటుండడం. ‘60-40’ ఒప్పందాలు ఇలాగే వుంటాయ్‌ మరి.