రాజకీయ నాయకులెందుకు ప్రభుత్వాసుపత్రుల్లో చేరట్లేదు.?

కరోనా వైరస్‌ నేపథ్యంలో రాజకీయ నాయకులు ‘ప్రభుత్వాసుపత్రుల్లో’ వైద్యం చేయించుకునేందుకు సుముఖత వ్యక్తం చేయకపోవడం కొత్త విషయమేమీ కాదు. ‘మా హయాంలో ప్రైవేటు ఆసుపత్రులకు ధీటుగా ప్రభుత్వాసుపత్రుల్ని ఉద్ధరించేశాం..’ అని చెప్పుకోని ప్రభుత్వం ఏదీ వుండదు. కానీ, అధికార పార్టీకి చెందిన నేతలు ఏదన్నా అనారోగ్యం వస్తే.. హుటాహుటిన ప్రైవేటు ఆసుపత్రికి.. అదీ ఎంత దూరంలో వున్నాసరే పరుగులు పెడతారు.

కొన్నేళ్ళ క్రితం అప్పటి మంత్రి కామినేని శ్రీనివాస్‌, ప్రభుత్వాసుపత్రిలో శస్త్ర చికిత్స చేయించుకున్నారు. ఉమ్మడి ఆంధ్రప్రదేశ్‌తోపాటు, విభజన తర్వాత తెలుగు రాష్ట్రాలకు గవర్నర్‌గా పనిచేసిన నరసింహన్‌ కూడా ప్రభుత్వాసుపత్రుల్లోనే వైద్యం చేయించుకోవడానికి ఇష్టపడేవారు. ఇప్పుడు పరిస్థితి వేరు. ఏపీ డిప్యూటీ సీఎం అంజాద్‌ బాషాకి కరోనా పాజిటివ్‌ అని తేలిందట. ఆయన తొలుత తిరుపతి ఆసుపత్రిలో చేరాలనుకున్నారట. కానీ, చివరి నిమిషంలో ఆలోచన మార్చుకుని కుటుంబ సభ్యులతో సహా హైద్రాబాద్‌ వెళ్ళి ఓ కార్పొరేట్‌ ఆసుపత్రిలో చేరారంటూ వార్తలొస్తున్నాయి.

షరామామూలుగానే ఈ వ్యవహారంపై విమర్శలు ప్రభుత్వంపైకి చాలా వేగంగానే దూసుకొచ్చేస్తుండడం గమనార్హం. అయితే, రాష్ట్రానికి చెందిన పలువురు రాజకీయ ప్రముఖులు, కరోనా వైరస్‌కి ఇంటి వద్దనే చికిత్స తీసుకుని కోలుకున్న సందర్భాలూ లేకపోలేదు. మాజీ మంత్రి మాణిక్యాలరావు, కరోనా వస్తే ఎవరూ ఆందోళన చెందాల్సిన అవసరం లేదంటూ.. తాను కరోనా బారిన పడ్డ విషయాన్ని ప్రస్తావవిస్త్రంచారు.. అందరికీ ఆదర్శంగా నిలిచారు. వైసీపీకి చెందిన ఎమ్మెల్యే కిలారి రోశయ్య కూడా, కరోనా బారిన పడ్డా, ప్రస్తుతం కోలుకుంటున్నారు.

ఇక, తెలంగాణ విషయానికొస్తే, ఉప ముఖ్యమంత్రి మొహమూద్‌ అలీ సహా పలువురు టీఆర్‌ఎస్‌ నేతలు ప్రైవేటు ఆసుపత్రుల్లోనే చికిత్స తీసుకోవడం గమనార్హం. ‘వాళ్ళు ప్రైవేటు ఆసుపత్రుల్లో చికిత్స తీసుకుంటున్నంతమాత్రాన ప్రభుత్వాసుపత్రుల్లో సేవలు బాగాలేవని కాదు అర్థం. ప్రజలంతా పరిస్థితిని అర్థం చేసుకోవాలి. పెద్దయెత్తున రికవరీలు కన్పిస్తున్నాయి కాబట్టి ఎవరూ ఆందోళన చెందాల్సిన అవసరం లేదు..’ అని తెలంగాణ హెల్త్‌ మినిస్టర్‌ ఈటెల రాజేందర్‌ నిన్న మీడియాతో మాట్లాడుతూ చెప్పారు. ఒక్కటి మాత్రం నిజం.. రాజకీయ నాయకులు ప్రభుత్వాసుపత్రుల్లో వైద్య చికిత్స పొందితే, ప్రజలకు ప్రభుత్వాసుపత్రులపై నమ్మకం మరింత పెరుగుతుంది.. తద్వారా ప్రైవేటు దోపిడీకి కూడా అడ్డుకట్ట పడుతుంది.