ముదురుతున్న దాసరి కుమారుల ఆస్తి వివాదం.. చిరు మద్యవర్థిత్వం వహించేనా?

తెలుగు సినీ దిగ్గజం, దర్శక నిర్మాత దాసరి నారాయణ రావు మృతి చెందిన తర్వాత ఆయన తనయులు ప్రభు మరియు అరుణ్‌ లు ఆస్తి కోసం గొడవ పడుతున్న విషయం తెల్సిందే. ఇద్దరు అన్నదమ్ములు ఇప్పటికే పలు సార్లు మీడియా ముందుకు వచ్చి ఒకరిపై ఒకరు విమర్శలు చేసుకోవడం చేశారు. జనవరి 26న ప్రభు అక్రమంగా అరుణ్ ఇంట్లోకి వచ్చి దాడి చేసాడని పోలీసులకి ఫిర్యాదు చేసాడు.

తాజాగా ఈ విషయంపై దాసరి అరుణ్‌ మాట్లాడుతూ.. ఆ ఇంటిని నాన్న గారు వీలునామాలో నాకు రాశారు. అది నా ఇల్లు కనుక నేను గేటు ఎక్కి దూకి పోతాను. గతంలో కూడా చాలా సార్లు నేను ఆ ఇంటి గేటు ఎక్కిద దూకి వెళ్లాను. నా ఇంటి గేటు ఎక్కి దూకి పోతే ఏంటీ ఎలా పోతే ఎంటీ అంటూ అరుణ్‌ పోలీసుల ముందు వాదనకు దిగాడు. ఇటీవల ప్రభు తన తమ్ముడు అరుణ్‌ గేటు దూకి వచ్చి నానా రచ్చ చేశాడు అంటూ కేసు పెట్టడంతో అరుణ్‌ ను పోలీసులు పిలిపించగా ఈ వ్యాఖ్యలు చేయడం చర్చనీయాంశం అయ్యింది.

గత కొన్ని సంవత్సరాలుగా సాగుతున్న ఈ వివాదంకు ఫుల్‌ స్టాప్‌ పెట్టే వారే లేకుండా పోయారు. గతంలో ఇండస్ట్రీలో ఏ చిన్న గొడవ జరిగినా కూడా దాసరి ముందుండేవారు. ఇండస్ట్రీ వారికి సమస్య వస్తే తాను మద్యవర్థిత్వం వహించి ఆ గొడవకు పరిష్కారం చూపించే వారు. దాసరి చనిపోయిన సమయంలో మోహన్‌ బాబుతో పాటు కొందరు ఆస్తి పంపకం విషయంలో మద్యవర్థిత్వం చేసేందుకు ప్రయత్నించారు. కాని దాసరి తనయులు వారి మాటలు వినుకోలేదు. దాంతో వారు ఆస్తి తగాదాను పట్టించుకోవడం మానేశారు.

దాసరి పరువు పోయేలా ఆయన కొడుకులు ఇద్దరు కూడా కొట్టుకుంటున్న సమయంలో చిరంజీవి ఈ వివాదానికి ఒక ఫుల్‌ స్టాప్‌ పెట్టాలంటూ కొందరు సినీ వర్గాల వారు అభిప్రాయం వ్యక్తం చేస్తున్నారు. ప్రస్తుతం సినిమా పరిశ్రమకు పెద్ద దిక్కుగా వ్యవహరిస్తున్నాడు. చిన్నా పెద్ద సమస్యలకు పరిష్కారాలు సూచిస్తూ ఉన్నాడు. అలాంటి చిరంజీవి దాసరి కుటుంబ సమస్యను తీర్చలేరా అంటూ కొందరు ప్రశ్నిస్తున్నారు. టాలీవుడ్‌ లో గొప్ప దర్శక నిర్మాతగా పేరు దక్కించుకున్న దాసరి కుటుంబ సమస్యను తీర్చడం టాలీవుడ్‌ బాధ్యత అని ఆ బాధ్యతను చిరంజీవి నెత్తిన పెట్టుకోవాలంటూ కొందరు అభిప్రాయం వ్యక్తం చేస్తున్నారు. మరి చిరంజీవి ఈ విషయమై ఎలా రియాక్ట్‌ అవుతారో చూడాలి.