డబ్బు కోసం ఎన్నారైకి గృహిణి వల.. పెళ్లి చేసుకుందామంటూ..

తేలికగా డబ్బు సంపాదించి విలాసంగా బతికేద్దామనుకుంది ఆ కుటుంబం. ఓ ఎన్నారైను మోసం చేసి లక్షల్లో డబ్బు వసూలు చేయటానికి ప్రయత్నించింది ఆ ఇంటి ఇల్లాలు. చేయాలనుకున్న మోసం చేసి చివరకు పోలీసులకు చిక్కారు. రంగారెడ్డి జిల్లా మోకిళ ప్రాంతంలో దేవతి శ్రీనివాస్, ఆయన భార్య మాళవిక అలియాస్ కీర్తి మాధవనేని, కుమారుడు ప్రణవ్, శ్రీనివాస్ తల్లి గజలక్ష్మి నివసిస్తున్నారు. ఓ మ్యాట్రిమోనిలో పెళ్లి సంబంధం కోసం అప్లై చేసిన వరుణ్ అనే వ్యక్తిని పరిచయం చేసుకుంది కీర్తి. ఇదే పేరుతో పెళ్లి సంబంధం కోసం తానూ అప్లై చేసుకుంది. ఇద్దరికీ ఈ జనవరిలో పరిచయాలయ్యాయి. మాటల్లో.. తన తండ్రి చనిపోయిన తర్వాత తల్లితో ఆస్తి సంబంధ గొడవలు ఉన్నాయని చెప్పింది. ఆస్తిని తన పేరు మీదకి మార్చుకుంటే కోట్ల ఆస్తి వస్తుందని నమ్మించింది.

విడతలుగా 65లక్షలు తన అకౌంట్ లో వేయించుకుంది. డబ్బు వేసిన తర్వాత ఆమెపై అనుమానం వచ్చి ఎంక్వైరీ చేయగా తాను మోసపోయినట్టు గ్రహించాడు ఎన్నారై. దీంతో మూడు రోజుల క్రితం జూబ్లీ హిల్స్ పోలిస్ స్టేషన్ లో కంప్లైంట్ చేయించాడు. ఈ కేసులో విచారణ చేపట్టిన పోలీసులు కీర్తిని, కుమారుడు ప్రవీణ్ ను అరెస్టు చేశారు. దీంతో శ్రీనివాస్, అతని తల్లి పరారయ్యారు. వీరిపై గతంలో కూడా నల్లకుంట, మారేడ్ పల్లి స్టేషన్లలో సైబర్ క్రైం కేసులు నమోదైనట్టు పోలీసులు తెలుసుకున్నారు. వీరు ఓ గోశాల కూడా నిర్వహిస్తున్నట్టు తెలుసుకున్నారు. కేసును అన్ని కోణాల్లో విచారిస్తున్నామని పోలీసులు తెలిపారు.