మూడు లాంతర్ల స్తంభం కూల్చివేతపై టీడీపీ నిరసన

విజయనగరం నిన్న రాత్రి అధికారులు కూల్చి వేసిన మూడు లాంతర్ల స్తంభం ఘటన పట్టణంలో తీవ్ర అలజడి రేపుతోంది. సుమారు 200 ఏళ్ల చరిత్ర కలిగిన ఈ స్తంభాన్ని కూల్చి వేయడం తగదనే ఆరోపణలు వస్తున్నాయి. రాజకీయ కారణాలతోనే ఈ స్తంభాన్ని కూల్చి వేశారని టీడీపీ ఆరోపిస్తోంది. విజయనగరంలో గజపతిరాజుల చరిత్రను కానరాకుండా చేయాలనే అధికార పార్టీ ఈ చర్యలు తీసుకుంటోందనే విమర్శలు వస్తున్నాయి.

దీనిపై టీడీపీ నాయకుడు అశోక్ గజపతిరాజు స్పందించారు. ‘ప్రభుత్వం అనైతిక చర్యలకు పాల్పడుతోందని ఆగ్రహం వ్యక్తం చేశారు. ప్రభుత్వ చర్యలతో పట్టణ ప్రజల మనోభావాలు దెబ్బ తింటున్నాయి. పట్టణంలో మూడు లాంతర్ల సెంటర్ కు చారిత్రక నేపథ్యం ఉంది’ అని అన్నారు. పూసపాటి గజపతుల కాలంలో దీనిని నిర్మించారు. మూడు వైపుల రహదారులున్న ఈ ప్రాంతంలో ప్రజల రాకపోకలకు వీలుగా ఇక్కడ స్తంభాన్ని ఏర్పాటు చేసి మూడు వైపుల లాంతర్లు ఏర్పాటు చేశారు.

దీంతో ప్రజలకు ఎంతో సౌకర్యంగా ఉండేది. దీనిని కూల్చేయడం ద్వారా వైసీపీ కుట్రపూరిత రాజకీయాలకు తెర లేపుతోంది. సీఎంగా జగన్ చిల్లర రాజకీయాలు చేస్తున్నారు. గజపతి రాజుల వారసత్వాన్ని చెరిపేసే ప్రయత్నాలు జరుగుతున్నాయని ఆరోపించారు. పట్టణంలో జరుగుతున్న అభివృద్ధి పనుల్లో భాగంగా కూల్చి వేశామని, మళ్లీ స్తంభాన్ని ప్రతిష్టిస్తామని అధికారలు చెప్తున్నా స్థానికంగా నిరసనలు వెల్లువెత్తుతున్నాయి.