‘మత్తు’ డాక్టర్‌ ఎపిసోడ్‌లో ఉక్కిరిబిక్కిరవుతున్న జగన్‌ సర్కార్‌.!

‘మత్తు’ డాక్టర్‌ సుధాకర్‌ ఉదంతంలో అధికార పార్టీకి తిప్పలు తప్పేలా కన్పించడంలేదు. ప్రభుత్వం ఇప్పటికే ఈ వ్యవహారంలో పూర్తిగా ఇరకాటంలో పడిపోయింది. ‘దళిత కార్డు’ ఓ వైపు, పోలీసుల అత్యుత్సాహం బట్టబయలవడం ఇంకో వైపు.. వెరసి ప్రభుత్వానిది ‘మింగలేక.. కక్కలేక..’ అన్నట్టుంది పరిస్థితి.

ఇదిలా వుంటే, డాక్టర్‌ సుధాకర్‌ని ఈ నెల 20న (అంటే రేపే) కోర్టులో హాజరు పరచాలని న్యాయస్థానం ఆదేశించడం గమనార్హం. మద్యం మత్తులో రోడ్డు మీద నానా వీరంగం సృష్టించిన మత్తు డాక్టర్‌ సుధాకర్‌ని సమర్థించలేం. ముఖ్యమంత్రిని పట్టుకుని బూతులు తిట్టాడాయన. ఓ బాధ్యతగల వైద్యుడు చేయాల్సిన పని కాదిది. కానీ, అదే సమయంలో.. ఆయనపై పోలీసుల దాష్టీకం ముమ్మాటికీ తప్పే. మద్యం మత్తులో వున్నాడని ప్రభుత్వమే చెబుతోంది.. పైగా, మానసిక స్థితి సరిగ్గా లేదని కూడా ప్రభుత్వమే చెబుతోంది.

ఈ లెక్కన, సుధాకర్‌ అనే వ్యక్తి డాక్టర్‌ కావొచ్చు.. సాధారణ వ్యక్తి కావొచ్చు.. అతనిపై పోలీసుల దాడి అమానుషం. కాళ్ళు, చేతులు కట్టేసి.. రోడ్డు మీద పడుకోబెట్టి.. అత్యంత హేయమైన చర్య ఇది. సభ్య సమాజం సిగ్గుతో తలదించుకోవాల్సిన ఘటన ఇది. దళితుడనే కాదు.. ఏ వ్యక్తికి ఇలాంటి పరిస్థితి ఎదురైనా అది క్షమార్హం కాదు. పైగా, అది పోలీసుల సమక్షంలో జరగడం ఇంకా దారుణం.

సోషల్‌ మీడియాలో డాక్టర్‌ సుధాకర్‌కి సంబంధించి పలు వీడియోలు హల్‌చల్‌ చేస్తున్నాయి. వాటిని పట్టుకుని, ఇలాంటి వ్యక్తిని సమర్థించడమా.? అని అధికార పార్టీ మద్దతుదారులు అంటున్నారు. కానీ, అసలు రాష్ట్రంలో మద్యం షాపులు ఎందుకు తెరిచినట్లు.? అన్న చర్చ తెరపైకొస్తోంది. అసలు మద్యమే అందుబాటులో లేకపోతే ఇలా జరిగేదా.! అన్న వాదనకి ప్రభుత్వం సమాధానం చెప్పగలదా.?

పైగా, మానసిక సమస్యతో డాక్టర్‌ సుధాకర్‌ బాధపడుతున్నట్లు ప్రభుత్వంలో వున్నవారే ‘సర్టిఫై’ చేశాక, ఆయన మీద జరిగిన దాష్టీకానికి ప్రభుత్వం ఎలా సమాధానం చెప్పుకోగలుగుతుంది.? మళ్ళీ ఈ ఎపిసోడ్‌లోనూ విశాఖ పోలీసులే కార్నర్‌ అయ్యారు. అధికార పార్టీ చేతుల్లో పావులుగా మారి, ప్రజల్ని రాచి రంపాన పెడుతున్నారనే విమర్శలు సోషల్‌ మీడియా వేదికగా వెల్లువెత్తుతుండడం గమనార్హం.