ఒకేరోజు 5వేలకు పైగా కేసులు.. లక్షకు చేరువగా..

కరోనా నియంత్రణ కోసం భారత్ లో లాక్ డౌన్ నాలుగో దశ మొదలైంది. కానీ అనూహ్యంగా ఒక్కరోజులోనే ఏకంగా 5,242 కేసులు నమోదు కావడం ఆందోళనకు గురిచేస్తోంది. మనదేశంలోకి కరోనా వచ్చిన తర్వాత ఒక్కరోజులో నమోదైన కేసుల్లో ఇదే అత్యధికం. దీంతో భారత్ లో మొత్తం కేసుల సంఖ్య 96,169కి చేరగా.. ఇప్పటివరకు 3,029 మంది ప్రాణాలు కోల్పోయారు. మహారాష్ట్రలో కరోనా తీవ్రంగా విజృంభిస్తోంది. ప్రస్తుతం నమోదైన 5,242 కేసుల్లో 2,347 కేసులు ఆ రాష్ట్రంలోనివే. దీంతో మహారాష్ట్రలో కరోనా కేసుల సంఖ్య 33వేలు దాటింది. ఆ తర్వాత స్థానాల్లో గుజరాత్, తమిళనాడు, ఢిల్లీ ఉన్నాయి.

ఇప్పటివరకు 36,824 మంది కోలుకోగా.. దేశంలో రికవరీ రేటు 38.29 శాతంగా ఉంది. దాదాపు రెండు నెలలుగా దేశంలో లాక్ డౌన్ అమల్లో ఉన్నా.. కేసుల సంఖ్య లక్షకు చేరువ కావడం పట్ల తీవ్ర ఆందోళన వ్యక్తమవుతోంది. నిజానికి లాక్ డౌన్ ఉండటం వల్లే వైరస్ వ్యాప్తిని ఈ మేరకైనా అడ్డుకోగలిగామని, లేకుంటే అమెరికాలో పరిస్థితి ఎలా ఉందో, అంతకంటే దారుణంగా ఇక్కడి పరిస్థితులు ఉండేవని పలువురు చెబుతున్నారు.

అయితే, లాక్ డౌన్ అమల్లో ఉన్నప్పటికీ, పలు సడలింపులు ఇవ్వడంతోనే కేసుల సంఖ్య పెరుగుతోందనే వాదనా వినిపిస్తోంది. ఇది చాలా కీలకమైన సమయమని, సడలింపులు ఇచ్చే విషయంలో ఒకటికి రెండు సార్లు ఆలోచించాలని ప్రపంచ ఆరోగ్య సంస్థ కూడా హెచ్చరికలు జారీచేసింది. కానీ సుదీర్ఘ కాలం లాక్ డౌన్ పొడిగించడం కూడా మంచిది కాదని, దాని వల్ల ఆర్థిక వ్యవస్థ కుప్పకూలడంతోపాటు ఆకలిచావులు కూడా పెరిగే ప్రమాదం ఉందని పలువురు ఆందోళన వ్యక్తంచేశారు.

ఈ నేపథ్యంలో లాక్ డౌన్ కొనసాగిస్తూ సడలింపులు ఇస్తున్నారు. తాజాగా కంటైన్మెంట్ జోన్లు మినహా మిగిలిన జోన్లలో చాలావాటికి వెసులుబాట్లు కల్పించారు. కొన్నింటిపై నిర్ణయాన్ని రాష్ట్రాలకే వదిలేశారు.