భారతదేశంలో 40 వేల మార్క్‌ దాటిన కరోనా!

‘దేశంలో వేడి పరిస్థితులు కరోనా వైరస్‌కి ఇబ్బందికరంగా మారతాయి.. అది భారతదేశానికి కలిసొచ్చే అంశం.. భారతదేశంలో కరోనా పాజిటివ్‌ కేసుల సంఖ్య తక్కువగానే వుండొచ్చు. ఆ మాటకొస్తే, భారతదేశంపై కరోనా పెద్దగా ప్రభావం చూపకపోవచ్చు..’ అని ప్రపంచ దేశాల్లోని పలువురు వైద్య రంగ నిపుణలు అంచనా వేశారు. కానీ, చూస్తుండగానే దేశంలో కరోనా పాజిటివ్‌ కేసుల సంఖ్య 40 వేలు దాటేసింది.

మహారాష్ట్రలో ఒకే రోజులో అత్యధికంగా నమోదైన కేసుల సంఖ్య 1008 అంటే, మనదేశం మీద కరోనా ఏ స్థాయిలో పంజా విసురుతోందో అర్థం చేసుకోవచ్చు. మహారాష్ట్రలో నిన్న దాదాపు 800 కరోనా పాజిటివ్‌ కేసులు నమోదయ్యాయి. ఢిల్లీ, తమిళనాడు తదితర రాష్ట్రాల్లో కరోనా ప్రభావం అధికంగా వుంది. తెలుగు రాష్ట్రాల్లో తెలంగాణతో పోల్చితే ఆంధ్రప్రదేశ్‌లో ఎక్కువ కేసు నమోదవుతున్నాయి.

ఆంధ్రప్రదేశ్‌లో తాజాగా 58 కరోనా పాజిటివ్‌ కేసులు నమోదయ్యాయి. దాంతో మొత్తం కరోనా పాజిటివ్‌ కేసుల సంఖ్య 1583కి చేరుకుంది. కాస్త ఊరట ఏంటంటే, డిశ్చార్జి అయినవారి సంఖ్య దాదాపు 500కి చేరుకుంటోంది ఆంధ్రప్రదేశ్‌లో. దేశంలో మొదట్లో విదేశీ లింకులతో కరోనా పాజిటివ్‌ కేసుల నమోదయ్యేవి.

కానీ, ఎప్పుడైతే ఢిల్లీలోని నిజాముద్దీన్‌ మర్కజ్‌ జమాత్‌ లింకులు బయటపడ్డాయో.. ఆ తర్వాత అనూహ్యంగా కరోనా పాజిటివ్‌ కేసుల సంఖ్య వేలల్లోకి చేరిపోయింది. కొన్ని ప్రాంతాల్లో కరోనా వైరస్‌ ‘సామాజిక వ్యాప్తి’ దశలో వుందనే అభిప్రాయాలు సర్వత్రా వ్యక్తమవుతున్న విషయం విదితమే. నిన్నటికి నిన్న దేశంలో కొత్తగా నమోదైన కరోనా పాజిటివ్‌ కేసుల సంఖ్య 2500కి పైనే. అంటే, పెరుగుదల చాలా ఎక్కువగా వుంటోంద్నమాట. ఈ లెక్కన, తదుపరి 10 వేల కేసుల నమోదవడానికి నాలుగైదు రోజులు సరిపోతుందేమో.! అంటే, అప్పటికి దేశంలో కరోనా పాజిటివ్‌ కేసు సంఖ్య మొత్తంగా 50 వేలకు చేరుకుంటుందన్నమాట. ఈలోగా రోజువారీ నమోదయ్యే కేసుల సంఖ్య ఇంకా పెరిగితే.. దేశంలో కరోనా పాజిటివ్‌ కేసుల సంఖ్య లక్షకు చేరడానికి పెద్దగా సమయం పట్టకపోవచ్చు కూడా.

అయితే, మే 7 తర్వాత దేశంలో కరోనా పాజిటివ్‌ కేసుల పెరుగుదల గణనీయంగా తగ్గుతుందని కేంద్రం చెబుతోంది. తగ్గితే సరేసరి.. లేకపోతే మాత్రం, దేశంలో పరిస్థితులు మరింత భయానకంగా తయారవుతాయన్నది నిర్వివాదాంశం.