బోర్డర్‌ టెన్షన్‌: జగన్‌ అలా విజయసాయిరెడ్డి ఇలా.!

ముఖ్యమంత్రి వైఎస్‌ జగన్‌ మోహన్‌రెడ్డి చెప్పింది వినాలా.? వైసీపీ ముఖ్య నేత, రాజ్యసభ సభ్యుడు విజయసాయిరెడ్డి చెప్పింది నిజమనుకోవాలా.? కరోనా వైరస్‌ నేపథ్యంలో దేశవ్యాప్తంగా లాక్‌డౌన్‌ కొనసాగుతున్న విషయం విదితమే. ఎక్కడివాళ్ళు అక్కడే వుండిపోయారు ఇప్పటిదాకా.! కానీ, కేంద్రం కల్పించిన తాజా వెసులుబాట్లతో రాష్ట్రాల మధ్య రాకపోకలు లేకపోయినా.. ప్రత్యేక పరిస్థితుల్లో ఇట్నుంచి, అటు.. అట్నుంచి ఇటు రావడానికి కాస్త వీలు కలిగింది.

గుజరాత్‌ నుంచి మత్సకారులు ఇటీవల ఆంధ్రప్రదేశ్‌కి చేరుకున్న వైనంపై అధికార వైసీపీ చేసిన పబ్లిసిటీ స్టంట్లు చూశాం. వాళ్ళంతా లాక్ డౌన్ నేపథ్యంలో గుజరాత్ లోనే నిన్న మొన్నటిదాకా ఇరుక్కుపోయారు. ‘ఇటలీ నుంచి వచ్చారు.. గుజరాత్‌ నుంచీ వచ్చారు.. హైద్రాబాద్‌ నుంచి చంద్రబాబు, లోకేష్‌ మాత్రం రావడంలేదు..’ అంటూ విజయసాయిరెడ్డి సోషల్‌ మీడియా వేదికగా సెటైర్‌ వేశారు.

ఇంతలోనే, ముఖ్యమంత్రి వైఎస్‌ జగన్‌, ‘ఎక్కడివారు అక్కడే వుండండి..’ అంటూ ‘బోర్డర్‌’ దాటి వస్తోన్న పొరుగు రాష్ట్రాలకు చెందినవారిని (మరీ ముఖ్యంగా తెలంగాణ నుంచి వచ్చేవారిని) ఉద్దేశించి విజ్ఞప్తి చేయడం గమనార్హం. ‘రాకపోకలు పెరిగితే, కరోనా వ్యాప్తిని అరికట్టలేం..’ అన్నది వైఎస్‌ జగన్‌ ఆలోచన. అది నిజం కూడా.

అయితే, కేంద్రం ఇచ్చిన వెసులుబాట్లతో తెలంగాణ ప్రభుత్వం, తెలంగాణ నుంచి ఏపీకి వెళ్ళేవారి కోసం ప్రత్యేకంగా పాసుల్ని మంజూరు చేసింది. ఈ పాసులు పట్టుకుని, తెలంగాణలో ఇప్పటిదాకా చిక్కుకుపోయిన ఆంధ్రప్రదేశ్‌కి చెందిన ప్రజలు, తమ సొంతూళ్ళకు వెళ్ళేందుకు ప్రయత్నించారు. అయితే, వారిని బోర్డర్‌లోనే అడ్డుకున్నారు ఆంధ్రప్రదేశ్‌ పోలీసులు. ‘తెలంగాణ ప్రభుత్వం ఇచ్చిన పాసులతో మాకు సంబంధం లేదు..’ అని ఆంధ్రప్రదేశ్‌కి చెందిన అధికారులు చెబుతుండడం గమనార్హం. దాంతో, మళ్ళీ తెలంగాణ ` ఆంధ్రప్రదేశ్‌ బోర్డర్ల మధ్య టెన్షన్‌ వాతావరణం నెలకొంటోంది.

గతంలో కూడా ఇదే తరహా పరిస్థితులు తలెత్తాయి. ఇరు రాష్ట్రాల ప్రభుత్వాలు స్పందించాయి.. ముఖ్యమంత్రుల స్థాయిలో చర్చు జరిగాక, పరిస్థితి కాస్త సద్దుమణిగింది. మరి, ఈసారి ఏమవుతుంది.? విజయసాయిరెడ్డి గొప్పలు జనాల కొంపలు ముంచేస్తున్నాయనుకోవాలా.? ప్రభుత్వంతో సంప్రదించకుండా విజయసాయిరెడ్డి ఓవరాక్షన్‌ చేస్తున్నా, ముఖ్యమంత్రి ఆయన్నెందుకు ఉపేక్షిస్తున్నట్లు.?