బిగ్‌ స్టోరీ: చంద్రబాబు అపర చాణక్యుడే కానీ.!

తెలుగుదేశం పార్టీ అధినేత నారా చంద్రబాబునాయుడు పుట్టిన రోజు నేడు. కాంగ్రెస్‌ పార్టీతో రాజకీయ జీవితాన్ని ప్రారంభించిన చంద్రబాబు, తెలుగుదేశం పార్టీ అధినేతగా ఎదిగారు. ఉమ్మడి ఆంధ్రప్రదేశ్‌ ముఖ్యమంత్రిగా 9 ఏళ్ళు పనిచేశారు. 13 జిల్లాల ఆంధ్రప్రదేశ్‌కి ఐదేళ్ళు ముఖ్యమంత్రిగా బాధ్యతలు నిర్వహించారు. సుదీర్ఘ రాజకీయ అనుభవం ఆయన సొంతం. జాతీయ స్థాయిలో చక్రం తిప్పిన ఘనుడాయన. ఒకప్పుడు ‘అపర చాణక్యుడి’గా గుర్తింపు పొందిన చంద్రబాబు, ‘వెన్నుపోటు’ రాజకీయాలకు కేరాఫ్‌ అడ్రస్‌గానూ నిలిచారు.

రైతులంటే గిట్టదనీ, దళితులంటే అస్సలు పొసగదనీ, అసలంటూ జీవితంలో ఏనాడూ నిజం చెప్పడం ఆయనకు ఇష్టముండదనీ.. చంద్రబాబు మీదకి దూసుకొచ్చే రాజకీయ విమర్శలు అన్నీ ఇన్నీ కావు. కానీ, చంద్రబాబులా సుదీర్ఘ రాజకీయ అనుభవం కలిగి, మూడు దఫాలు ముఖ్యమంత్రిగా పరిపాలన చేపట్టిన రాజకీయ నాయకుడు తెలుగు నాట ఇంకొకరు లేరంటారు చంద్రబాబు మద్దతుదారులు. పిల్లనిచ్చిన మామ స్వర్గీయ ఎన్టీఆర్‌ని రాజకీయంగా వెన్నుపోటు పొడిచి, తెలుగుదేశం పార్టీ పగాల్ని చంద్రబాబు చేపట్టారన్నది నిర్వివాదాంశం. దీనికి ఆయన ‘నాయకత్వ మార్పు’ అనే పేరు పెట్టినా, చరిత్రను వక్రీకరిస్తానంటే కుదరదు కదా.! అదే చంద్రబాబు రాజకీయంగా ఎదగడానికి కారణమయ్యింది.. అదే చంద్రబాబు రాజకీయ జీవితంలో ఎప్పటికీ చెరిపేసుకోలేని మచ్చ.

అపర చాణక్యుడిగా దేశ రాజకీయాల్లోనూ చక్రం తిప్పిన చంద్రబాబు, ఆనాటి వాడి.. వేడి.. మాత్రం ఇప్పుడు చూపించలేకపోతున్నారు. చంద్రబాబు ఎవర్నీ నమ్మరు.. తన నీడను తానే నమ్మరు.! అయితే, చంద్రబాబు కొందర్ని నమ్ముతారు.. ఎలాంటోళ్ళనంటే, తనను రాజకీయంగా వెన్నుపోటు పొడిచేవారిని. అదే, చంద్రబాబుని ఇప్పుడు ఈ స్థితిలోకి తీసుకొచ్చింది. తెలుగుదేశం పార్టీ తెలంగాణలో నాశనమయ్యింది.. ఆంధ్రప్రదేశ్‌లోనూ అదే పరిస్థితి. దీనంతటికీ చంద్రబాబు స్వయంకృతాపరాధమే కారణం. పుత్ర రత్నం నారా లోకేష్‌ కారణంగా పార్టీ భ్రష్టుపట్టిపోయిందన్న విమర్శలు వెల్లువెత్తుతున్నా, ఆ తప్పిదాన్ని సరిదిద్దుకోలేని దుస్థితి చంద్రబాబుది. గతమెంతో ఘనం.. ప్రస్తుతం గందరగోళం.. భవిష్యత్‌ భయానకం.. ఇదీ ఇప్పుడు చంద్రబాబు పరిస్థితి.

ఏడు పదుల వయసులోకి అడుగు పెట్టిన చంద్రబాబు నుంచి మళ్ళీ మునుపటి రాజకీయ చాణక్యాన్ని చూడగలమా.? అవకాశమే లేదన్నది మెజార్టీ అభిప్రాయం. చంద్రబాబు మాత్రం, వయసు శరీరానికే.. మనసుకు కాదంటారు. కానీ, అది మాటల్లో చూపలేకపోతున్నారు.