అధికార వైసీపీలో అలజడి.. దేనికి సంకేతం.?

ఆంధ్రప్రదేశ్‌లో అధికార వైఎస్సార్‌ కాంగ్రెస్‌ పార్టీకి ‘న్యాయస్థానం నుంచి మొట్టికాయలు’ కొత్తేమీ కాదు. ఇప్పటికే చాలా మొట్టికాయల్ని తినేసింది వైఎస్‌ జగన్‌ ప్రభుత్వం. కానీ, ఎందుకో.. ఇంగ్లీషు మీడియం విషయంలో ప్రభుత్వం జారీ చేసిన జీవోల్ని హైకోర్టు కొట్టివేయడంతో అధికార పార్టీలో తీవ్ర అసహనం వ్యక్తమవుతోంది.

ఎన్నికల కమిషనర్‌ని కులం పేరుతో ముఖ్యమంత్రి దూషించినట్లు.. హైకోర్టు విషయంలో అంత అత్యుత్సాహం చూపే పరిస్థితి లేదు. అందుకే, ఆ అక్కసుని విపక్షాల మీద ప్రదర్శిస్తున్నారు అధికార వైసీపీ నేతలు. న్యాయస్థానం ఇచ్చిన తీర్పుని రాజకీయం చేస్తున్నారంటూ మంత్రులు మొదలుకొని వైసీపీ నేతలంతా విరుచుకుపడిపోతున్నారు.

అరరె, ఇలా ఇప్పుడు నోరు పారేసుకున్నోళ్ళలో చాలామంది గత కొద్ది కాలంగా ఎక్కడా కన్పించడంలేదే.. అని ఆయా నియోజకవర్గాల్లోని ప్రజలు ముక్కున వేలేసుకుంటున్నారు. కరోనా దెబ్బకి రాష్ట్రం విలవిల్లాడుతున్నా లైట్‌ తీసుకున్న నేతలు, ఇప్పుడేదో ‘వైసీపీ’ కొంప మునిగిపోయిందనుకుని ఇంత అత్యుత్సాహం ప్రదర్శిస్తున్నారేంటి చెప్మా.? అని ఆశ్చర్యపోతున్నారు రాష్ట్ర ప్రజానీకం.

చంద్రబాబు మనవడు ఏ మీడియం చదువుతున్నాడు.? పవన్‌ కళ్యాణ్‌ తన పిల్లల్ని ఏ మీడియంలో చదివించారు.? అన్న ప్రశ్నలు అత్యంత ‘తింగరితనంతో’ అధికార పార్టీ నేతలు వేసేస్తున్నారు. ఇక్కడ సమస్య వేరు.. వైసీపీ నేతలు వెల్లగక్కుతున్న అక్కసు వేరు. తెలుగు మీడియం వుండడమా.? తీసేయడమా.? అన్నది అసలు సమస్య. ఇంగ్లీషు మీడియం కావాలా.? వద్దా.? అన్నది కాదు. ఏ మీడియంలో తమ పిల్లల్ని చదివించాలో తల్లిదండ్రులకే వదిలెయ్యాలన్నది ఇక్కడ సుస్పష్టం.

న్యాయస్థానం కూడా అదే చెప్పింది. మాతృభాషలో విద్యాభ్యాసంపై సుప్రీంకోర్టు తీర్పులున్నాయి. కానీ, ఇవేవీ వైసీపీ నేతలకు అవసరం లేదు.. నిజానికి, అంత పరిజ్ఞానం వున్న నేతలూ వైసీపీలో లేరనుకోవాలేమో.!

తాను పట్టిన కుందేలుకి మూడే కాళ్ళు అంటే ఎలా.? సరే, ఇంగ్లీషు మీడియం – తెలుగు మీడియం సంగతి ఏమవుతుందన్నది వేరే చర్చ. కానీ, ఇప్పుడు రాష్ట్రంలో కరోనా పరిస్థితేంటి.? రాష్ట్ర ప్రజల భవిష్యత్తేంటి.? ఇవేవీ అధికార పార్టీ నేతలకి అవసరం లేదేమో.. నిన్న మొన్నటిదాకా కన్పించని నేతలు.. ఇంగ్లీషు మీడియం పేరుతో మళ్ళీ పబ్లిసిటీ స్టంట్లు చేసేస్తున్నారు నిస్సిగ్గుగా.