కరోనా ఎఫెక్ట్: వైద్యులకు ఇంటి కష్టాలు

వైద్యో నారాయణో హరి అనేది నానుడి. దేవుడి తర్వాత దేవుడిగా భావించేది డాక్టర్లనే. అలాంటి వైద్యులకు కరోనా పుణ్యమా అని ఇక్కట్లు మొదలయ్యాయి. రేయింబవళ్లు ప్రాణాలు ఫణంగా పెట్టి మరీ పనిచేస్తున్న డాక్టర్లను జనం ఎలా చూసుకోవాలి? కానీ బాధ్యత మరచిన కొంతమంది ఇంటి యజమానులు వైద్యులను వెంటనే తమ ఇల్లు ఖాళీ చేయాలని ఒత్తిడి చేస్తున్నారు. దేశ రాజధాని ఢిల్లీ నుంచి వరంగల్ వరకు ఇదే పరిస్థితి నెలకొంది.

విపత్కర పరిస్థితి నెలకొన్న ప్రస్తుత తరుణంలో సంఘటితంగా ఉండాల్సింది పోయి సంకుచిత మనస్తత్వంతో, లేనిపోని భయాలతో ఇలా వ్యవహరిస్తున్నారనే విమర్శలు వ్యక్తమవుతున్నాయి. వరంగల్ ఎంజీఎంలో పనిచేస్తున్న కొంతమంది వైద్య సిబ్బందికి అక్కడ సొంత ఇల్లు లేకపోవడంతో అద్దె ఇళ్లలో ఉంటున్నారు. అయితే, కరోనా రోగులకు చికిత్స చేస్తున్న డాక్టర్లకు కూడా ఆ వైరస్ సోకే ప్రమాదం ఉందని, వారు తమ ఇంట్లో ఉంటే తాము కూడా ఆ ప్రాణాంతక మహమ్మారి బారిన పడతామనే ఆందోళనతో వెంటనే ఇల్లు ఖాళీ చేయాలంటూ బలవంతం చేస్తున్నారు. వైద్యులకు అద్దెకు ఇంటిని ఇచ్చే ప్రసక్తి లేదని కుండ బద్దలుకొడుతున్నారు.

దీంతో ఇప్పటికప్పుడు ఎక్కడికెళ్లాలో తెలియక డాక్టర్లు ఇబ్బందులు పడుతున్నారు. ఈ విషయం తెలియడంతో వరంగల్ కలెక్టర్ హెచ్చరికలు జారీచేశారు. ఎవరైనా వైద్యులను ఇల్లు ఖాళీ చేయాలని ఒత్తిడి చేస్తే ఊరుకునేది లేదని స్పష్టంచేశారు. కానీ వీటిని ఎవరూ లెక్క చేయడంలేదు. మరోవైపు ఢిల్లీలో కూడా ఇదే పరిస్థితి ఉండటంతో ఏకంగా కేంద్ర హోంమంత్రి అమిత్ షా రంగంలోకి దిగారు. ఢిల్లీ పోలీస్ కమిషనర్ తో ఫోన్ లోమాట్లాడి. అలాంటి ఇంటి యజమానులపై కఠినంగా వ్యవహరించాలని సూచించారు.

మరోవైపు వైద్యులపై కొంతమంది ఇంటి యజమానులు చూపిస్తున్న వివక్షపై సోషల్ మీడియాలో తీవ్రంగా విమర్శలు వెల్లువెత్తుతున్నాయి.