కీలక నిర్ణయం: తెలుగు రాష్ట్రాలు లాక్ డౌన్

జనతా కర్ఫ్యూ విజయవంతం అయ్యింది. ప్రజలు స్వచ్చందంగా జనతా కర్ఫ్యూలో పాల్గొన్నారు. విజయవంతం చేశారు. ఉదయం 7 గంటల నుంచి రాత్రి 9 గంటల వరకు 14 గంటల పాటు ఇంట్లో నుంచి బయటకు రాకుండా ఉంటె సరిపోతుందని అనుకున్నారు. అయితే, ఒక్క 14 గంటల పాటు బయటకు రాకుండా ఉంటె సరిపోతుందని ప్రజలు అనుకున్నారు. కానీ, కేంద్రం ఈ మధ్యాహ్నం సమయంలో ఓ కీలక నిర్ణయం తీసుకుంది. కరోనా పాజిటివ్ కేసులు అధికంగా ఉన్న 75 జిల్లాలను లాక్ డౌన్ చేయాలని ఆదేశించింది.

దీనిపై సమీక్షించిన తెలుగు రాష్ట్రాలు మరో అడుగు ముందుకు వేసి, మార్చి 31 వరకు లాక్ డౌన్ చేయాలని తెలుగు రాష్ట్రాలు నిర్ణయం తీసుకున్నాయి. ఈ మార్చి 31 వరకు ఎవరూ కూడా బయటకు రాకూడదని ఇప్పటికే ఆదేశాలు జారీ చేశారు. ఒకవేళ బయటకు వచ్చినా డిస్టెన్స్ మెయింటైన్ చేయాలని సీఎంలు పేర్కొన్నారు. నిత్యావసర సరుకులకు సంబంధించిన షాపులు మినహా వేటికి అనుమతి లేదని పేర్కొన్నారు.

ప్రైవేట్ సంస్థలలో పనిచేసే ఉద్యోగులకు ఈ వారం రోజులపాటు జీతాలు తప్పనిసరిగా ఇవ్వాలని ముఖ్యమంత్రులు ఆదేశించారు. ఇక పేదలకు 12 కేజీల రేషన్ బియ్యంతో పాటుగా రూ.1500 ఇవ్వబోతున్నట్టు తెలంగాణ ముఖ్యమంత్రి కేసీఆర్ ప్రకటిస్తే, రేషన్ బియ్యంతో పాటుగా ఒక కేజీ పప్పుతో పాటుగా రూ. 1000 ప్రతి ఇంటికి ఇస్తున్నట్టు ప్రకటించారు. విదేశాల నుంచి వచ్చిన వ్యక్తులు తప్పనిసరిగా వారి వివరాలు ప్రభుత్వానికి అందజేయాలని, లేదంటే వారిపై కఠిన చర్యలు తీసుకునే అవకాశం ఉంటుందని తెలుగు రాష్ట్రాల ముఖ్యమంత్రులు పేర్కొన్నారు.

త్వరలోనే ఏపీలో బడ్జెట్ సమావేశాలు ఏర్పాటు చేసి వీలైనంత త్వరగా ముగించేస్తామని, బడ్జెట్ ఆమోదం పొందకపోతే ఇప్పటి పరిస్థితులకు తగినట్టుగా డబ్బులు కేటాయించడం కష్టం అవుతుందని జగన్ పేర్కొన్నారు. ఆంధ్ర ప్రదేశ్ బోర్డర్ ను కూడా క్లోజ్ చేస్తున్నట్టు సీఎం జగన్ ఈ సందర్భంగా పేర్కొన్నారు. అదే విధంగా నిత్యవసర వస్తువుల ధరలను ప్రభుత్వమే నిర్ణయిస్తుందని ఎవరైనా అంతకు మించి ఎక్కువ అమ్మితే కఠిన చర్యలు తీసుకుంటామని ఏపీ సీఎం పేర్కొన్నారు.