జనతా కర్‌ఫ్యూ: దేశమంతా ఒక్క తాటిపైకొచ్చింది

దేశమంతా ఒక్కటవడం మనకి కొత్తేమీ కాదు. పాకిస్తాన్‌, మన మీద తీవ్రవాదాన్ని ప్రయోగించిన ప్రతిసారీ.. దేశమంతా ఒకే తాటిపైకి వచ్చింది. అయితే, ఆ సందర్భాలు వేరు.. ఇప్పటి పరిస్థితి వేరు. ప్రపంచాన్ని కబళిస్తోన్న మహమ్మారి ‘కోవిడ్‌ 19’ (కరోనా వైరస్‌)ని ఎదుర్కొనేందుకు భారత ప్రధాన మంత్రి నరేంద్ర మోడీ ‘జనతా కర్‌ఫ్యూ’ని ప్రతిపాదిస్తే, దేశమంతా ‘సై’ అంది. ఈ రోజు ఉదయం 7 గంటలకు ప్రారంభమైన జనతా కర్‌ఫ్యూ రాత్రి 9 గంటలకు ముగియనుంది.

కాగా, తెలంగాణలో అయితే ఈ రోజు ఉదయం 6 గంటలకే జనతా కర్‌ఫ్యూ ప్రారంభమయ్యింది. ఆదివారం ఉదయం 6 గంటలకు ప్రారంభమైన జనతా కర్‌ఫ్యూ సోమవారం తెల్లవారు ఝామున 6 గంటలకు ముగుస్తుంది. తెలంగాణలో దాదాపుగా ఎక్కడా ఎవరూ రోడ్ల మీదకు రాలేదు. పోలీసులు, మీడియా సిబ్బంది తప్ప సాధారణ ప్రజలు రోడ్ల మీదకు వచ్చేందుకు ఇష్టపడలేదు. ఆంధ్రప్రదేశ్‌లోనూ దాదాపు ఇదే పరిస్థితి వుంది. అయితే, కొన్ని చోట్ల మాత్రం జనం రోడ్ల మీదకు వచ్చి ఖాళీ రోడ్లను తమ మొబైల్‌ ఫోన్‌ కెమెరాలతో చిత్రీకరించేందుకు పోటీ పడ్డారు. ఇదేం పైత్యం.? అని ఈ వీడియోల్ని చూసినవారు ముక్కున వేలేసుకుంటున్నారనుకోండి.. అది వేరే విషయం.

తెలుగు రాష్ట్రాల్లో కరోనా కేసులు రోజురోజుకీ పెరుగుతున్నాయి. తెలంగాణలో కరోనా పాజిటివ్‌ కేసుల సంఖ్య ఎక్కువ వున్నా, ‘కేసీఆర్‌ బతికున్నంతవరకూ తెలంగాణ ప్రజలెవరూ ఆందోళన చెందాల్సిన అవసరం లేదు..’ అంటూ తెలంగాణ ముఖ్యమంత్రి కేసీఆర్‌ ఇచ్చిన భరోసా, తెలంగాణ ప్రజానీకం నుంచి నిజంగానే ‘కరోనా ఆందోళన’ దూరం చేసింది.. ఆందోళన స్థానంలో బాధ్యతను పెంచుకుంది తెలంగాణ ప్రజానీకం.

తెలుగు రాష్ట్రాల పరిస్థితి ఇలా వుంటే, దేశవ్యాప్తంగానూ జనతా కర్‌ఫ్యూ విజయవంతంగా కొనసాగుతోంది. దేశమంతా ఒకే మాట మీద ఎలా నిలబడింది.? అని ప్రపంచ దేశాలు భారతదేశాన్ని చూసి ఆశ్చర్యపోతున్నాయంటే అతిశయోక్తి కాదేమో. కష్టమే అయినా, ఇంకో రెండు మూడు రోజులు ఈ కర్‌ఫ్యూ కొనసాగితే మంచిదన్న అభిప్రాయం చాలామందిలో వ్యక్తమవుతోంది. కరోనా పట్ల భయం అలాంటిది మరి.!